jis ko jaisa bhi hai darkar use waisa mil jae

jis ko jaisā bhī hai darkār use vaisā mil jaa.e

tū mayassar ho mujhe aur tujhe duniyā mil jaa.e

sañg se sañg ke Takrāne kā manzar dekhūñ

kabhī aisā ho ki tujh ko koī tujh sā mil jaa.e

ye dhaḌaktā huā dil us ke havāle kar duuñ

ek bhī shaḳhs agar shahr meñ zinda mil jaa.e

saḳht sardī meñ ThiThurtī hai bahut ruuh mirī

jism-e-yār aa ki bechārī ko sahārā mil jaa.e

shahr kī bhiiḌ mujhe terā bulāvā manzūr

shart ye hai mirā khoyā huā sahrā mil jaa.e

tū ḳhudā hai to mujhe kufr meñ mustahkam kar

ki mujhe rāz-e-sanam-ḳhāna-e-duniyā mil jaa.e

ham to bas dhuup kī shiddat meñ kamī chāhte haiñ

kab kahā hai ki kahīñ raah meñ saayā mil jaa.e

apne ā.īna-e-tauhīd meñ allāh-miyāñ

dekhte rahiye koī aap hī jaisā mil jaa.e

fasl-e-sher aa.ī hai bāzār-e-suḳhan meñ dekh aao

farhat-ehsās bhī shāyad koī taaza mil jaa.e

jis ko jaisa bhi hai darkar use waisa mil jae

tu mayassar ho mujhe aur tujhe duniya mil jae

sang se sang ke Takrane ka manzar dekhun

kabhi aisa ho ki tujh ko koi tujh sa mil jae

ye dhaDakta hua dil us ke hawale kar dun

ek bhi shaKHs agar shahr mein zinda mil jae

saKHt sardi mein ThiThurti hai bahut ruh meri

jism-e-yar aa ki bechaari ko sahaara mil jae

shahr ki bhiD mujhe tera bulawa manzur

shart ye hai mera khoya hua sahra mil jae

tu KHuda hai to mujhe kufr mein mustahkam kar

ki mujhe raaz-e-sanam-KHana-e-duniya mil jae

hum to bas dhup ki shiddat mein kami chahte hain

kab kaha hai ki kahin rah mein saya mil jae

apne aaina-e-tauhid mein allah-miyan

dekhte rahiye koi aap hi jaisa mil jae

fasl-e-sher aai hai bazar-e-suKHan mein dekh aao

farhat-ehsas bhi shayad koi taza mil jae