jo kahta hai ki dariya dekh aaya

jo kahtā hai ki dariyā dekh aayā

ġhalat mausam meñ sahrā dekh aayā

Dagar aur manzileñ to ek sī thiiñ

vo phir mujh se judā kyā dekh aayā

har ik manzar ke pas-manzar the itne

bahut kuchh be-irāda dekh aayā

kisī ko ḳhaak de kar aa rahā huuñ

zamīñ kā asl chehra dekh aayā

rukā mahfil meñ itnī der tak maiñ

ujāloñ kā buḌhāpā dekh aayā

tasallī ab huī kuchh dil ko mere

tirī galiyoñ ko suunā dekh aayā

tamāshā.ī meñ jaañ aTkī huī thī

palaT kar phir kināra dekh aayā

bahut gadlā thā paanī is nadī kā

magar maiñ apnā chehra dekh aayā

maiñ is hairat meñ shāmil huuñ to kaise

na jaane vo kahāñ kyā dekh aayā

vo manzar dā.imī itnā hasīñ thā

ki maiñ hī kuchh ziyāda dekh aayā

jo kahta hai ki dariya dekh aaya

ghalat mausam mein sahra dekh aaya

Dagar aur manzilen to ek si thin

wo phir mujh se juda kya dekh aaya

har ek manzar ke pas-manzar the itne

bahut kuchh be-irada dekh aaya

kisi ko KHak de kar aa raha hun

zamin ka asl chehra dekh aaya

ruka mahfil mein itni der tak main

ujalon ka buDhapa dekh aaya

tasalli ab hui kuchh dil ko mere

teri galiyon ko suna dekh aaya

tamashai mein jaan aTki hui thi

palaT kar phir kinara dekh aaya

bahut gadla tha pani is nadi ka

magar main apna chehra dekh aaya

main is hairat mein shamil hun to kaise

na jaane wo kahan kya dekh aaya

wo manzar daimi itna hasin tha

ki main hi kuchh ziyaada dekh aaya