jo log dushman-e-jaan the wahi sahaare the

jo log dushman-e-jāñ the vahī sahāre the

munāfe the mohabbat meñ ne ḳhasāre the

huzūr-e-shāh bas itnā hī arz karnā hai

jo iḳhtiyār tumhāre the haq hamāre the

ye aur baat bahāreñ gurez-pā niklīñ

guloñ ke ham ne to sadqe bahut utāre the

ḳhudā kare ki tirī umr meñ gine jaa.eñ

vo din jo ham ne tire hijr meñ guzāre the

ab izn ho to tirī zulf meñ piro deñ phuul

ki āsmāñ ke sitāre to isti.āre the

qarīb aa.e to har gul thā ḳhāna-e-zambūr

'nadīm' duur ke manzar to pyāre pyāre the

jo log dushman-e-jaan the wahi sahaare the

munafe the mohabbat mein ne KHasare the

huzur-e-shah bas itna hi arz karna hai

jo iKHtiyar tumhaare the haq hamare the

ye aur baat bahaaren gurez-pa niklin

gulon ke hum ne to sadqe bahut utare the

KHuda kare ki teri umr mein gine jaen

wo din jo hum ne tere hijr mein guzare the

ab izn ho to teri zulf mein piro den phul

ki aasman ke sitare to istiare the

qarib aae to har gul tha KHana-e-zambur

'nadim' dur ke manzar to pyare pyare the