jo pardon mein KHud ko chhupae hue hain

jo pardoñ meñ ḳhud ko chhupā.e hue haiñ

qayāmat vahī to uThā.e hue haiñ

tirī anjuman meñ jo aa.e hue haiñ

ġham-e-do-jahāñ ko bhulā.e hue haiñ

pahāḌoñ se bhī jo uThā.e na uTThā

vo bār-e-vafā ham uThā.e hue haiñ

koī shaam ke vaqt aa.egā lekin

sahar se ham āñkheñ bichhā.e hue haiñ

jahāñ bijliyāñ ḳhud amaañ DhūñDtī haiñ

vahāñ ham nasheman banā.e hue haiñ

ġhazal aabrū hai tū urdu zabāñ kī

tirī aabrū ham bachā.e hue haiñ

ye ash.ār yuuñ hī nahīñ dard-āgīñ

'hafīz' aap bhī choT khaa.e hue haiñ

jo pardon mein KHud ko chhupae hue hain

qayamat wahi to uThae hue hain

teri anjuman mein jo aae hue hain

gham-e-do-jahan ko bhulae hue hain

pahaDon se bhi jo uThae na uTTha

wo bar-e-wafa hum uThae hue hain

koi sham ke waqt aaega lekin

sahar se hum aankhen bichhae hue hain

jahan bijliyan KHud aman DhunDti hain

wahan hum nasheman banae hue hain

ghazal aabru hai tu urdu zaban ki

teri aabru hum bachae hue hain

ye ashaar yun hi nahin dard-agin

'hafiz' aap bhi choT khae hue hain