jo puchha munh dikhane aap kab chilman se niklenge

jo pūchhā muñh dikhāne aap kab chilman se nikleñge

to bole aap jis din hashr meñ madfan se nikleñge

jalegā dil tumheñ bazm-e-adū meñ dekh kar merā

dhuāñ ban ban ke armāñ mahfil-e-dushman se nikleñge

ikaTThe kar ke terī dūsrī tasvīr khīñchūñgā

vo sab jalve jo chhan chhan kar tirī chilman se nikleñge

siyah poshāk dosh-e-nāz par bikhrī huī zulfeñ

mire mātam kī shirkat ko baḌe joban se nikleñge

hameñ parvā nahīñ is kī qayāmat laakh baar aa.e

na tum madfan pe aaoge na ham madfan se nikleñge

tire dāman se badlā leñge zālim ḳhūn-e-nāhaq kā

vo favvāre lahū ke jo mirī gardan se nikleñge

yahī rishta junūn-e-āshiqī kā hai to kuchh din meñ

mire tār-e-garebāñ yaar ke dāman se nikleñge

hazāroñ husn vaale is zamīñ meñ dafn haiñ 'muztar'

qayāmat hogī jab ye sab ke sab madfan se nikleñge

jo puchha munh dikhane aap kab chilman se niklenge

to bole aap jis din hashr mein madfan se niklenge

jalega dil tumhein bazm-e-adu mein dekh kar mera

dhuan ban ban ke arman mahfil-e-dushman se niklenge

ikaTThe kar ke teri dusri taswir khinchunga

wo sab jalwe jo chhan chhan kar teri chilman se niklenge

siyah poshak dosh-e-naz par bikhri hui zulfen

mere matam ki shirkat ko baDe joban se niklenge

hamein parwa nahin is ki qayamat lakh bar aae

na tum madfan pe aaoge na hum madfan se niklenge

tere daman se badla lenge zalim KHun-e-nahaq ka

wo fawware lahu ke jo meri gardan se niklenge

yahi rishta junun-e-ashiqi ka hai to kuchh din mein

mere tar-e-gareban yar ke daman se niklenge

hazaron husn wale is zamin mein dafn hain 'muztar'

qayamat hogi jab ye sab ke sab madfan se niklenge