junun mein daman-e-dil garche tar tar hua

junūñ meñ dāman-e-dil garche taar taar huā

magar ye jashn sar-e-kūcha-e-bahār huā

har ek sajde meñ dil ko tirā ḳhayāl aayā

ye ik gunāh ibādat meñ baar baar huā

sameT lī haiñ mohabbat ne saarī parvāzeñ

dil-o-dimāġh meñ kaisā ye intishār huā

nahīñ bujhāyā havāoñ ne pahlī baar charāġh

ye sāneha to mire saath baar baar huā

kisī ke vāste tasvīr-e-intizār the ham

vo aa gayā pa kahāñ ḳhatm intizār huā

añdherī shab ke muqaddar meñ ik saverā thā

ye raaz mujh pe dam-e-sub.h āshkār huā

jo tujh meñ Duub ke dekhā to pā liyā ḳhud ko

'alīnā' yuuñ mirā phir mujh pe iḳhtiyār huā

junun mein daman-e-dil garche tar tar hua

magar ye jashn sar-e-kucha-e-bahaar hua

har ek sajde mein dil ko tera KHayal aaya

ye ek gunah ibaadat mein bar bar hua

sameT li hain mohabbat ne sari parwazen

dil-o-dimagh mein kaisa ye intishaar hua

nahin bujhaya hawaon ne pahli bar charagh

ye saneha to mere sath bar bar hua

kisi ke waste taswir-e-intizar the hum

wo aa gaya pa kahan KHatm intizar hua

andheri shab ke muqaddar mein ek sawera tha

ye raaz mujh pe dam-e-subh aashkar hua

jo tujh mein Dub ke dekha to pa liya KHud ko

'alina' yun mera phir mujh pe iKHtiyar hua