kaam aa sakin na apni wafaen to kya karen

kaam aa sakīñ na apnī vafā.eñ to kyā kareñ

us bevafā ko bhuul na jaa.eñ to kyā kareñ

mujh ko ye e'tirāf duāoñ meñ hai asar

jaa.eñ na arsh par jo duā.eñ to kyā kareñ

ik din kī baat ho to use bhuul jaa.eñ ham

nāzil hoñ dil pe roz balā.eñ to kyā kareñ

zulmat-ba-dosh hai mirī duā-e-āshiqī

tāroñ kī mish.ale na churā.eñ to kyā kareñ

shab bhar to un kī yaad meñ taare ginā kiye

taare se din ko bhī nazar aa.eñ to kyā kareñ

ahd-e-tarab kī yaad meñ royā kiye bahut

ab muskurā ke bhuul na jaa.eñ to kyā kareñ

ab jī meñ hai ki un ko bhulā kar hī dekh leñ

vo baar baar yaad jo aa.eñ to kyā kareñ

va.ade ke e'tibār meñ taskīn-e-dil to hai

ab phir vahī fareb na khā.eñ to kyā kareñ

tark-e-vafā bhī jurm-e-mohabbat sahī magar

milne lageñ vafā kī sazā.eñ to kyā kareñ

kaam aa sakin na apni wafaen to kya karen

us bewafa ko bhul na jaen to kya karen

mujh ko ye e'tiraf duaon mein hai asar

jaen na arsh par jo duaen to kya karen

ek din ki baat ho to use bhul jaen hum

nazil hon dil pe roz balaen to kya karen

zulmat-ba-dosh hai meri dua-e-ashiqi

taron ki mishale na churaen to kya karen

shab bhar to un ki yaad mein tare gina kiye

tare se din ko bhi nazar aaen to kya karen

ahd-e-tarab ki yaad mein roya kiye bahut

ab muskura ke bhul na jaen to kya karen

ab ji mein hai ki un ko bhula kar hi dekh len

wo bar bar yaad jo aaen to kya karen

wade ke e'tibar mein taskin-e-dil to hai

ab phir wahi fareb na khaen to kya karen

tark-e-wafa bhi jurm-e-mohabbat sahi magar

milne lagen wafa ki sazaen to kya karen