kah gaya kuchh to zer-e-lab koi

kah gayā kuchh to zer-e-lab koī

jaan detā hai be-sabab koī

jaave qāsid udhar to ye kahiyo

raah taktā hai roz o shab koī

go ki āñkhoñ meñ apnī aave jaan

muñh dikhātā hai ham ko kab koī

ban gayā huuñ maiñ sūrat-e-dīvār

sāmne aa gayā hai jab koī

garche ham saa.e us parī ke rahe

na milā jhāñkne kā Dhab koī

had ḳhush aayā ye sher-e-'mīr' mujhe

kar ke laayā thā muntaḳhab koī

ab ḳhudā maġhfirat kare us kī

'mīr' marhūm thā ajab koī

ai falak us ko tū ġhanīmat jaan

'mus.hafī' sā nahīñ hai ab koī

kah gaya kuchh to zer-e-lab koi

jaan deta hai be-sabab koi

jawe qasid udhar to ye kahiyo

rah takta hai roz o shab koi

go ki aankhon mein apni aawe jaan

munh dikhata hai hum ko kab koi

ban gaya hun main surat-e-diwar

samne aa gaya hai jab koi

garche hum sae us pari ke rahe

na mila jhankne ka Dhab koi

had KHush aaya ye sher-e-'mir' mujhe

kar ke laya tha muntaKHab koi

ab KHuda maghfirat kare us ki

'mir' marhum tha ajab koi

ai falak us ko tu ghanimat jaan

'mushafi' sa nahin hai ab koi