kahin jaise main koi chiz rakh kar bhul jata hun

kahīñ jaise maiñ koī chiiz rakh kar bhuul jaatā huuñ

pahan letā huuñ jab dastār to sar bhuul jaatā huuñ

vagarna to mujhe sab yaad rahtā hai sivā is ke

kahāñ huuñ kaun huuñ kyuuñ huuñ maiñ aksar bhuul jaatā huuñ

mire is haal se gumrāh ho jaate haiñ rahbar bhī

maiñ aksar rāste meñ apnā hī ghar bhuul jaatā huuñ

dikhātā phir rahā huuñ sab ko apne zaḳhm-e-sar lekin

mire hāthoñ meñ bhī hai ek patthar bhuul jaatā huuñ

nikal jaatā huuñ ḳhud apne hisār-e-zāt se bāhar

maiñ aksar paañv phailāne meñ chādar bhuul jaatā huuñ

kabhī jab sochne lagtā huuñ pas-e-manzar ke baare meñ

to mere sāmne ho koī manzar bhuul jaatā huuñ

kabhī to itnā baḌh jaatī hai merī pyaas kī shiddat

mire chāroñ taraf hai ik samundar bhuul jaatā huuñ

kahin jaise main koi chiz rakh kar bhul jata hun

pahan leta hun jab dastar to sar bhul jata hun

wagarna to mujhe sab yaad rahta hai siwa is ke

kahan hun kaun hun kyun hun main aksar bhul jata hun

mere is haal se gumrah ho jate hain rahbar bhi

main aksar raste mein apna hi ghar bhul jata hun

dikhata phir raha hun sab ko apne zaKHm-e-sar lekin

mere hathon mein bhi hai ek patthar bhul jata hun

nikal jata hun KHud apne hisar-e-zat se bahar

main aksar panw phailane mein chadar bhul jata hun

kabhi jab sochne lagta hun pas-e-manzar ke bare mein

to mere samne ho koi manzar bhul jata hun

kabhi to itna baDh jati hai meri pyas ki shiddat

mere chaaron taraf hai ek samundar bhul jata hun