kahin se saz-e-shikasta ki phir sada aai

kahīñ se sāz-e-shikasta kī phir sadā aa.ī

bahut dinoñ meñ ik āvāz āshnā aa.ī

chalī kuchh aaj is andāz se nasīm-e-sahar

ki baar baar kisī kī sadā-e-pā aa.ī

tumhārī tal.at-e-zebā ko kar liyā sajda

nazar jahāñ bhī koī shakl-e-dilrubā aa.ī

'ajīb lutf huā un kī yaad se mahsūs

ki jaise dil ke darīche khule havā aa.ī

rah-e-hayāt meñ kāñTe bikherne vāle!

hayāt bhī tire dar tak barahna-pā aa.ī

chaman se pahle to ik sail-e-ātishīñ guzrā

phir us ke baa'd barastī huī ghaTā aa.ī

shurū'-e-'ishq meñ un se hī kuchh hijāb na thā

kabhī kabhī to ḳhud apne se bhī hayā aa.ī

ham apne hāl-e-pareshāñ pe bārhā ro.e

aur us ke baa'd hañsī ham ko bārhā aa.ī

kabhī qarīb se chheḌā jo sāz-e-jāñ ko 'ra.īs'

to gosh-e-dil meñ bahut duur kī sadā aa.ī

kahin se saz-e-shikasta ki phir sada aai

bahut dinon mein ek aawaz aashna aai

chali kuchh aaj is andaz se nasim-e-sahar

ki bar bar kisi ki sada-e-pa aai

tumhaari talat-e-zeba ko kar liya sajda

nazar jahan bhi koi shakl-e-dilruba aai

'ajib lutf hua un ki yaad se mahsus

ki jaise dil ke dariche khule hawa aai

rah-e-hayat mein kanTe bikherne wale!

hayat bhi tere dar tak barahna-pa aai

chaman se pahle to ek sail-e-atishin guzra

phir us ke ba'd barasti hui ghaTa aai

shuru'-e-'ishq mein un se hi kuchh hijab na tha

kabhi kabhi to KHud apne se bhi haya aai

hum apne haal-e-pareshan pe barha roe

aur us ke ba'd hansi hum ko barha aai

kabhi qarib se chheDa jo saz-e-jaan ko 'rais'

to gosh-e-dil mein bahut dur ki sada aai