kaise kahen ki chaar taraf daera na tha

kaise kaheñ ki chaar taraf dā.era na thā

jaate kahāñ ki ḳhud se pare rāstā na thā

jab saañs le rahī thī daraḳhtoñ ke ās-pās

āvāz de rahī thī koī boltā na thā

ḳhud se chale to rah-guzar ā.īna ho ga.ī

apne sivā.e aur koī sūjhtā na thā

ab ke basant aa.ī to āñkheñ ujaḌ ga.iiñ

sarsoñ ke khet meñ koī patta harā na thā

parda hilā ke bād-e-sahar duur tak ga.ī

ḳhushbū kidhar se aa.ī kisī ko patā na thā

guzrī tamām umr usī shahr meñ jahāñ

vāqif sabhī the go koī pahchāntā na thā

ai 'ashk' ik kitāb paḌhī thī varaq varaq

vo tīrgī thī lafz koī sūjhtā na thā

kaise kahen ki chaar taraf daera na tha

jate kahan ki KHud se pare rasta na tha

jab sans le rahi thi daraKHton ke aas-pas

aawaz de rahi thi koi bolta na tha

KHud se chale to rah-guzar aaina ho gai

apne siwae aur koi sujhta na tha

ab ke basant aai to aankhen ujaD gain

sarson ke khet mein koi patta hara na tha

parda hila ke baad-e-sahar dur tak gai

KHushbu kidhar se aai kisi ko pata na tha

guzri tamam umr usi shahr mein jahan

waqif sabhi the go koi pahchanta na tha

ai 'ashk' ek kitab paDhi thi waraq waraq

wo tirgi thi lafz koi sujhta na tha