kali par muskurahaT aaj bhi malum hoti hai

kalī par muskurāhaT aaj bhī ma.alūm hotī hai

magar bīmār hoñToñ par hañsī ma.alūm hotī hai

asīrī kī ḳhushī kis ko ḳhushī ma.alūm hotī hai

charāġhāñ ho rahā hai tīrgī ma.alūm hotī hai

ba-zāhir rū-e-gul par tāzgī ma.alūm hotī hai

magar barbād chehre kī ḳhushī ma.alūm hotī hai

nasīm-e-sub.h tū kyā sone vāloñ ko jagā.egī

abhī to sub.h ḳhud soī huī ma.alūm hotī hai

chaman kā lutf khotā hai chaman meñ ajnabī honā

ḳhizāñ bhī apne gulshan kī bhalī ma.alūm hotī hai

tujhe ham dopahar kī dhuup meñ dekheñge ai ġhunche

abhī shabnam ke rone par hañsī ma.alūm hotī hai

chalīñ garm āñdhiyāñ sūraj bhī chamkā ḳhāk-e-maqtal par

vahī ḳhūn-e-shahīdāñ kī namī ma.alūm hotī hai

zarā ai mai-kasho anjām-e-mahfil par nazar rakhnā

ki daur-e-āḳhirī meñ niiñd sī ma.alūm hotī hai

mah o anjum ke ḳhāliq kuchh na.e taare farozāñ kar

ki phir āfāq meñ be-raunaqī ma.alūm hotī hai

samundar bhī hai dariyā bhī hai chashme bhī haiñ nahreñ bhī

aur insāñ hai ki ab tak tishnagī ma.alūm hotī hai

zamāne kī taraqqī tishna-e-takmīl hai yā rab

abhī ik mard-e-momin kī kamī ma.alūm hotī hai

na jaao dekh lo sham-e-sahar kā jhilmilānā bhī

ye mahfil kī bahār-e-āḳhirī ma.alūm hotī hai

to phir karnā hī paḌtā hai vahāñ iqrār qudrat kā

jahāñ insān ko apnī kamī ma.alūm hotī hai

mirī ik aah par jo phuul dāman chaak karte the

ab un ko mere nāloñ par hañsī ma.alūm hotī hai

ba-zāhir chashm-e-sāqī mahv-e-ḳhvāb-e-nāz hai lekin

javāb-e-nargis-e-bedār bhī ma.alūm hotī hai

hamesha ḳhush rahe un kī nigāhoñ kī masīhā.ī

ab apnī zindagī bhī zindagī ma.alūm hotī hai

mohabbat hai zarūr un se magar merī matānat ko

na jaane kyuuñ ye nisbat bhī burī ma.alūm hotī hai

'shafīq' āsār haiñ mashriq kī jānib taaza kirnoñ ke

ye merī shām-e-nau kī chāñdnī ma.alūm hotī hai

kali par muskurahaT aaj bhi malum hoti hai

magar bimar honTon par hansi malum hoti hai

asiri ki KHushi kis ko KHushi malum hoti hai

charaghan ho raha hai tirgi malum hoti hai

ba-zahir ru-e-gul par tazgi malum hoti hai

magar barbaad chehre ki KHushi malum hoti hai

nasim-e-subh tu kya sone walon ko jagaegi

abhi to subh KHud soi hui malum hoti hai

chaman ka lutf khota hai chaman mein ajnabi hona

KHizan bhi apne gulshan ki bhali malum hoti hai

tujhe hum dopahar ki dhup mein dekhenge ai ghunche

abhi shabnam ke rone par hansi malum hoti hai

chalin garm aandhiyan suraj bhi chamka KHak-e-maqtal par

wahi KHun-e-shahidan ki nami malum hoti hai

zara ai mai-kasho anjam-e-mahfil par nazar rakhna

ki daur-e-aKHiri mein nind si malum hoti hai

mah o anjum ke KHaliq kuchh nae tare farozan kar

ki phir aafaq mein be-raunaqi malum hoti hai

samundar bhi hai dariya bhi hai chashme bhi hain nahren bhi

aur insan hai ki ab tak tishnagi malum hoti hai

zamane ki taraqqi tishna-e-takmil hai ya rab

abhi ek mard-e-momin ki kami malum hoti hai

na jao dekh lo sham-e-sahar ka jhilmilana bhi

ye mahfil ki bahaar-e-aKHiri malum hoti hai

to phir karna hi paDta hai wahan iqrar qudrat ka

jahan insan ko apni kami malum hoti hai

meri ek aah par jo phul daman chaak karte the

ab un ko mere nalon par hansi malum hoti hai

ba-zahir chashm-e-saqi mahw-e-KHwab-e-naz hai lekin

jawab-e-nargis-e-bedar bhi malum hoti hai

hamesha KHush rahe un ki nigahon ki masihai

ab apni zindagi bhi zindagi malum hoti hai

mohabbat hai zarur un se magar meri matanat ko

na jaane kyun ye nisbat bhi buri malum hoti hai

'shafiq' aasar hain mashriq ki jaanib taza kirnon ke

ye meri sham-e-nau ki chandni malum hoti hai