kam-baKHt dil bura ho teri aah aah ka

kam-baḳht dil burā ho tirī aah aah kā

husn-e-nigāh bhī na rahā gaah gaah kā

chheḌo na mīThī niiñd meñ ai munkar-o-nakīr

sone do bhaa.ī maiñ thakā-māñda huuñ raah kā

mere muqallidoñ ko mirī rāh-e-shauq meñ

har gaam par nishān milā sajda-gāh kā

dil sā gavāh hashr meñ aa kar phisal gayā

ab rahm par muāmla hai dād-ḳhvāh kā

kis muñh se kah rahe ho hameñ kuchh ġharaz nahīñ

kis muñh se tum ne vā'da kiyā thā nibāh kā

dil lene vaalī baat isī dil se pochhiye

mālik yahī hai mere safed o siyāh kā

pesh-e-ḳhudā chalo to maza jab hai ai 'hafīz'

na.ara ho lab pe ashhado-an-lā-ilāh kā

kam-baKHt dil bura ho teri aah aah ka

husn-e-nigah bhi na raha gah gah ka

chheDo na miThi nind mein ai munkar-o-nakir

sone do bhai main thaka-manda hun rah ka

mere muqallidon ko meri rah-e-shauq mein

har gam par nishan mila sajda-gah ka

dil sa gawah hashr mein aa kar phisal gaya

ab rahm par muamla hai dad-KHwah ka

kis munh se kah rahe ho hamein kuchh gharaz nahin

kis munh se tum ne wa'da kiya tha nibah ka

dil lene wali baat isi dil se pochhiye

malik yahi hai mere safed o siyah ka

pesh-e-KHuda chalo to maza jab hai ai 'hafiz'

nara ho lab pe ashhado-an-la-ilah ka