kamal-e-husn hai husn-e-kamal se bahar

kamāl-e-husn hai husn-e-kamāl se bāhar

azal kā rañg hai jaise misāl se bāhar

to phir vo kaun hai jo māvarā hai har shai se

nahīñ hai kuchh bhī yahāñ gar ḳhayāl se bāhar

ye kā.enāt sarāpā javāb hai jis kā

vo ik savāl hai phir bhī savāl se bāhar

hai yaad ahl-e-vatan yuuñ ki reg-e-sāhil par

girī huī koī machhlī ho jaal se bāhar

ajiib silsila-e-rañg hai tamannā bhī

had-e-urūj se aage zavāl hai bāhar

na us kā ant hai koī na isti.āra hai

ye dāstān hai hijr-o-visāl se bāhar

duā buzurgoñ kī rakhtī hai zaḳhm ulfat ko

kisī ilaaj kisī indimāl se bāhar

bayāñ ho kis tarah vo kaifiyat ki hai 'amjad'

mirī talab se farāvāñ majāl se bāhar

kamal-e-husn hai husn-e-kamal se bahar

azal ka rang hai jaise misal se bahar

to phir wo kaun hai jo mawara hai har shai se

nahin hai kuchh bhi yahan gar KHayal se bahar

ye kaenat sarapa jawab hai jis ka

wo ek sawal hai phir bhi sawal se bahar

hai yaad ahl-e-watan yun ki reg-e-sahil par

giri hui koi machhli ho jal se bahar

ajib silsila-e-rang hai tamanna bhi

had-e-uruj se aage zawal hai bahar

na us ka ant hai koi na istiara hai

ye dastan hai hijr-o-visal se bahar

dua buzurgon ki rakhti hai zaKHm ulfat ko

kisi ilaj kisi indimal se bahar

bayan ho kis tarah wo kaifiyat ki hai 'amjad'

meri talab se farawan majal se bahar