kaun maslub hua husn ka kirdar ki hum

kaun maslūb huā husn kā kirdār ki ham

shohrat-e-ishq meñ badnām huā yaar ki ham

din ko thā kūcha-e-dildār meñ sāyoñ kā hujūm

raat aa.ī to ga.e sāya-e-dīvār ki ham

ishq ke rabt se hai husn kā paikar tābāñ

kaT ke ab aap hue naqsh-ba-dīvār ki ham

shor-e-tahsīn se haiñ ḳhalq ke chehre raushan

surḳh-rū bāzū-e-qātil hai ki talvār ki ham

kis ko ḳhāmosh mohabbat pe bharosā na rahā

vo haiñ lafzoñ meñ mohabbat ke talabgār ki ham

kaun maslub hua husn ka kirdar ki hum

shohrat-e-ishq mein badnam hua yar ki hum

din ko tha kucha-e-dildar mein sayon ka hujum

raat aai to gae saya-e-diwar ki hum

ishq ke rabt se hai husn ka paikar taban

kaT ke ab aap hue naqsh-ba-diwar ki hum

shor-e-tahsin se hain KHalq ke chehre raushan

surKH-ru bazu-e-qatil hai ki talwar ki hum

kis ko KHamosh mohabbat pe bharosa na raha

wo hain lafzon mein mohabbat ke talabgar ki hum