KHak aaina dikhati hai ki pahchan mein aa

ḳhaak ā.īna dikhātī hai ki pahchān meñ aa

aks-e-nāyāb mire dīda-e-hairān meñ aa

hai sharāra havas-āmāda-e-parvāz bahut

yam-e-zulmāt bulātā hai ki tūfān meñ aa

jagmagātā huā ḳhanjar mire siine meñ utaar

raushnī le ke kabhī ḳhāna-e-vīrān meñ aa

is tarah chhup ki koī DhūñDh nikāle tujh ko

āsmānoñ se utar kar had-e-imkān meñ aa

baiTh jā apne kaTe sar ko liye hāthoñ meñ

thak gayā maiñ bhī yahāñ ganj-e-shahīdān meñ aa

ramna ḳhālī ram-e-āhū-e-ma.ānī se huā

chhup ke baiThā hī thā maiñ 'zeb' niystān meñ aa

KHak aaina dikhati hai ki pahchan mein aa

aks-e-nayab mere dida-e-hairan mein aa

hai sharara hawas-amada-e-parwaz bahut

yam-e-zulmat bulata hai ki tufan mein aa

jagmagata hua KHanjar mere sine mein utar

raushni le ke kabhi KHana-e-viran mein aa

is tarah chhup ki koi DhunDh nikale tujh ko

aasmanon se utar kar had-e-imkan mein aa

baiTh ja apne kaTe sar ko liye hathon mein

thak gaya main bhi yahan ganj-e-shahidan mein aa

ramna KHali ram-e-ahu-e-maani se hua

chhup ke baiTha hi tha main 'zeb' niystan mein aa