KHabar to dur amin-e-KHabar nahin aae

ḳhabar to duur amīn-e-ḳhabar nahīñ aa.e

bahut dinoñ se vo lashkar idhar nahīñ aa.e

ye baat yaad rakheñge talāshne vaale

jo us safar pe ga.e lauT kar nahīñ aa.e

tilism ūñghtī rātoñ kā toḌne vaale

vo muḳhbirān-e-sahar phir nazar nahīñ aa.e

zarūr tujh se bhī ik roz uub jā.eñge

ḳhudā kare ki tirī rahguzar nahīñ aa.e

savāl kartī ka.ī āñkheñ muntazir haiñ yahāñ

javāb aaj bhī ham soch kar nahīñ aa.e

udaas suunī sī chhat aur do bujhī āñkheñ

ka.ī dinoñ se phir 'āshufta' ghar nahīñ aa.e

KHabar to dur amin-e-KHabar nahin aae

bahut dinon se wo lashkar idhar nahin aae

ye baat yaad rakhenge talashne wale

jo us safar pe gae lauT kar nahin aae

tilism unghti raaton ka toDne wale

wo muKHbiran-e-sahar phir nazar nahin aae

zarur tujh se bhi ek roz ub jaenge

KHuda kare ki teri rahguzar nahin aae

sawal karti kai aankhen muntazir hain yahan

jawab aaj bhi hum soch kar nahin aae

udas suni si chhat aur do bujhi aankhen

kai dinon se phir 'ashufta' ghar nahin aae