khaDa tha kab se zamin piTh par uThae hue

khaḌā thā kab se zamīñ piiTh par uThā.e hue

aab aadmī hai qayāmat se lau lagā.e hue

ye dasht se umaD aayā hai kis kā sail-e-junūñ

ki husn-e-shahr khaḌā hai naqāb uThā.e hue

ye bhed tere sivā ai ḳhudā kise mālūm

azaab TuuT paḌe mujh pe kis ke laa.e hue

ye sail-e-āb na thā zalzala thā paanī kā

bikhar bikhar ga.e qarye mire basā.e hue

ajab tazād meñ kaaTā hai zindagī kā safar

laboñ pe pyaas thī bādal the sar pe chhā.e hue

sahar huī to koī apne ghar meñ ruk na sakā

kisī ko yaad na aa.e diye jalā.e hue

ḳhudā kī shaan ki munkir haiñ ādamiyyat ke

ḳhud apnī sukḌī huī zaat ke satā.e hue

jo āstīn chaḌhā.eñ bhī muskurā.eñ bhī

vo log haiñ mire barsoñ ke āzmā.e hue

ye inqilāb to ta.amīr ke mizāj meñ hai

girā.e jaate haiñ aivāñ bane-banā.e hue

ye aur baat mire bas meñ thī na guuñj is kī

mujhe to muddateñ guzrīñ ye giit gaa.e hue

mirī hī god meñ kyuuñ kaT ke gir paḌe haiñ 'nadīm'

abhī duā ke liye the jo haath uThā.e hue

khaDa tha kab se zamin piTh par uThae hue

aab aadmi hai qayamat se lau lagae hue

ye dasht se umaD aaya hai kis ka sail-e-junun

ki husn-e-shahr khaDa hai naqab uThae hue

ye bhed tere siwa ai KHuda kise malum

azab TuT paDe mujh pe kis ke lae hue

ye sail-e-ab na tha zalzala tha pani ka

bikhar bikhar gae qarye mere basae hue

ajab tazad mein kaTa hai zindagi ka safar

labon pe pyas thi baadal the sar pe chhae hue

sahar hui to koi apne ghar mein ruk na saka

kisi ko yaad na aae diye jalae hue

KHuda ki shan ki munkir hain aadamiyyat ke

KHud apni sukDi hui zat ke satae hue

jo aastin chaDhaen bhi muskuraen bhi

wo log hain mere barson ke aazmae hue

ye inqilab to tamir ke mizaj mein hai

girae jate hain aiwan bane-banae hue

ye aur baat mere bas mein thi na gunj is ki

mujhe to muddaten guzrin ye git gae hue

meri hi god mein kyun kaT ke gir paDe hain 'nadim'

abhi dua ke liye the jo hath uThae hue