KHadshe the sham-e-hijr ke subh-e-KHushi ke sath

ḳhadshe the shām-e-hijr ke sub.h-e-ḳhushī ke saath

tārīkiyāñ bhī paa.ī ga.iiñ raushnī ke saath

jaarī hai sub.h-o-shām jafāoñ kā silsila

kitnā hai un ko rabt mirī zindagī ke saath

ab dekhnā hai mujh ko tire āstāñ kā zarf

sar ko jhukā rahā huuñ baḌī ājizī ke saath

zaḳhm-e-jigar khulā to tabassum kahā gayā

insāf ho sakā na chaman meñ kalī ke saath

lamhe to zindagī meñ mile an-ginat magar

ik lamha bhī guzār na paa.e ḳhushī ke saath

vaqt-e-sahar hai uTTho kamar tum bhī bāñdh lo

sūraj nikal rahā hai na.ī raushnī ke saath

'sāqī' har ik ke bas kā nahīñ kār-e-mai-kashī

ādāb-e-mai-kashī bhī haiñ kuchh mai-kashī ke saath

KHadshe the sham-e-hijr ke subh-e-KHushi ke sath

tarikiyan bhi pai gain raushni ke sath

jari hai subh-o-sham jafaon ka silsila

kitna hai un ko rabt meri zindagi ke sath

ab dekhna hai mujh ko tere aastan ka zarf

sar ko jhuka raha hun baDi aajizi ke sath

zaKHm-e-jigar khula to tabassum kaha gaya

insaf ho saka na chaman mein kali ke sath

lamhe to zindagi mein mile an-ginat magar

ek lamha bhi guzar na pae KHushi ke sath

waqt-e-sahar hai uTTho kamar tum bhi bandh lo

suraj nikal raha hai nai raushni ke sath

'saqi' har ek ke bas ka nahin kar-e-mai-kashi

aadab-e-mai-kashi bhi hain kuchh mai-kashi ke sath