KHamoshi bas KHamoshi thi ijazat ab hui hai

ḳhamoshī bas ḳhamoshī thī ijāzat ab huī hai

ishāroñ ko tire paḌhne kī jur.at ab huī hai

ajab lahje meñ karte the dar-o-dīvār bāteñ

mire ghar ko bhī shāyad merī aadat ab huī hai

gumāñ huuñ yā haqīqat sochne kā vaqt kab tak

ye ho kar bhī na hone kī musībat ab huī hai

achānak haḌbaḌā kar niiñd se maiñ jaag uThā huuñ

purānā vāqi.a hai jis pe hairat ab huī hai

yahī kamra thā jis meñ chain se ham jī rahe the

ye tanhā.ī to itnī be-muravvat ab huī hai

bichhaḌnā hai hameñ ik din ye donoñ jānte the

faqat ham ko judā hone kī fursat ab huī hai

ajab thā mas.ala apnā ajab sharmindagī thī

ḳhafā jis raat par the vo sharārat ab huī hai

mohabbat ko tirī kab se liye baiThe the dil meñ

magar is baat ko kahne kī himmat ab huī hai

KHamoshi bas KHamoshi thi ijazat ab hui hai

ishaaron ko tere paDhne ki jurat ab hui hai

ajab lahje mein karte the dar-o-diwar baaten

mere ghar ko bhi shayad meri aadat ab hui hai

guman hun ya haqiqat sochne ka waqt kab tak

ye ho kar bhi na hone ki musibat ab hui hai

achanak haDbaDa kar nind se main jag uTha hun

purana waqia hai jis pe hairat ab hui hai

yahi kamra tha jis mein chain se hum ji rahe the

ye tanhai to itni be-murawwat ab hui hai

bichhaDna hai hamein ek din ye donon jaante the

faqat hum ko juda hone ki fursat ab hui hai

ajab tha masala apna ajab sharmindagi thi

KHafa jis raat par the wo shararat ab hui hai

mohabbat ko teri kab se liye baiThe the dil mein

magar is baat ko kahne ki himmat ab hui hai