KHud apne aks ko hairat se dekhta hun main

ḳhud apne aks ko hairat se dekhtā huuñ maiñ

kanār-e-āb baḌī der se khaḌā huuñ maiñ

svāñg bhartā phirūñ kab talak mohabbat ke

maiñ kyuuñ na saaf hī kah duuñ ki bevafā huuñ maiñ

sunā na qisse mujhe dāmanoñ kī ismat ke

ki tere shahr ke logoñ ko jāntā huuñ maiñ

vo kaun hai jo mire saath saath chaltā hai

ye dekhne ko ka.ī baar ruk gayā huuñ maiñ

maiñ aaj dekh sakūñgā tulūa kā manzar

ki raat biit chalī aur jāgtā huuñ maiñ

sitam hai tū bhī mujhe ḳhud-ġharaz samajhtā hai

ki tere haq meñ to ḳhud se bhī laḌ rahā huuñ maiñ

vo jī rahe haiñ ki jo soch se hue aarī

maiñ mar rahā huuñ ki 'betāb' sochtā huuñ maiñ

KHud apne aks ko hairat se dekhta hun main

kanar-e-ab baDi der se khaDa hun main

swang bharta phirun kab talak mohabbat ke

main kyun na saf hi kah dun ki bewafa hun main

suna na qisse mujhe damanon ki ismat ke

ki tere shahr ke logon ko jaanta hun main

wo kaun hai jo mere sath sath chalta hai

ye dekhne ko kai bar ruk gaya hun main

main aaj dekh sakunga tulua ka manzar

ki raat bit chali aur jagta hun main

sitam hai tu bhi mujhe KHud-gharaz samajhta hai

ki tere haq mein to KHud se bhi laD raha hun main

wo ji rahe hain ki jo soch se hue aari

main mar raha hun ki 'betab' sochta hun main