KHud apni KHwahishen KHak-e-badan mein bone ko

ḳhud apnī ḳhvāhisheñ ḳhāk-e-badan meñ bone ko

mirā vajūd tarastā hai mere hone ko

ye dekhnā hai ki baarī mirī kab aa.egī

khaḌā huuñ sāhil-e-dariyā pe lab bhigone ko

abhī se kyā rakheñ āñkhoñ pe saare din kā hisāb

abhī to raat paḌī hai ye bojh Dhone ko

na koī takiya-e-ġham hai na koī chādar-e-ḳhvāb

hameñ ye kaun sā bistar milā hai sone ko

vo duur thā to bahut hasrateñ thiiñ paane kī

vo mil gayā hai to jī chāhtā hai khone ko

KHud apni KHwahishen KHak-e-badan mein bone ko

mera wajud tarasta hai mere hone ko

ye dekhna hai ki bari meri kab aaegi

khaDa hun sahil-e-dariya pe lab bhigone ko

abhi se kya rakhen aankhon pe sare din ka hisab

abhi to raat paDi hai ye bojh Dhone ko

na koi takiya-e-gham hai na koi chadar-e-KHwab

hamein ye kaun sa bistar mila hai sone ko

wo dur tha to bahut hasraten thin pane ki

wo mil gaya hai to ji chahta hai khone ko