KHud dil mein rah ke aankh se parda kare koi

ḳhud dil meñ rah ke aañkh se parda kare koī

haañ lutf jab hai pā ke bhī DhūñDā kare koī

tum ne to hukm-e-tark-e-tamannā sunā diyā

kis dil se aah tark-e-tamannā kare koī

duniyā laraz ga.ī dil-e-hirmāñ-nasīb kī

is tarah sāz-e-aish na chheḌā kare koī

mujh ko ye aarzū vo uThā.eñ naqāb ḳhud

un ko ye intizār taqāzā kare koī

rañgīni-e-naqāb meñ gum ho ga.ī nazar

kyā be-hijābiyoñ kā taqāzā kare koī

yā to kisī ko jur.at-e-dīdār hī na ho

yā phir mirī nigāh se dekhā kare koī

hotī hai is meñ husn kī tauhīn ai 'majāz'

itnā na ahl-e-ishq ko rusvā kare koī

KHud dil mein rah ke aankh se parda kare koi

han lutf jab hai pa ke bhi DhunDa kare koi

tum ne to hukm-e-tark-e-tamanna suna diya

kis dil se aah tark-e-tamanna kare koi

duniya laraz gai dil-e-hirman-nasib ki

is tarah saz-e-aish na chheDa kare koi

mujh ko ye aarzu wo uThaen naqab KHud

un ko ye intizar taqaza kare koi

rangini-e-naqab mein gum ho gai nazar

kya be-hijabiyon ka taqaza kare koi

ya to kisi ko jurat-e-didar hi na ho

ya phir meri nigah se dekha kare koi

hoti hai is mein husn ki tauhin ai 'majaz'

itna na ahl-e-ishq ko ruswa kare koi