KHud ko samjha hai faqat wahm-o-guman bhi humne

ḳhud ko samjhā hai faqat vahm-o-gumāñ bhī ham ne

ḳhud ko paayā hai dil-e-kaun-o-makāñ bhī ham ne

dekh phūloñ se lade dhuup nahā.e hue peḌ

hañs ke kahte haiñ guzārī hai ḳhizāñ bhī ham ne

shafaq-e-sub.h se tābinda saman-zār se pūchh

raat kaaTī sū-e-gardūñ-nigrāñ bhī ham ne

dekh kar abr bhar aa.ī haiñ ḳhushī se āñkheñ

sūkhte hoñToñ pe pherī hai zabāñ bhī ham ne

jin ke gītoñ meñ hai nik.hat kī lapak phuul kā ras

sālhā-sāl sunī un kī fuġhāñ bhī ham ne

ab umañgeñ haiñ tarañgeñ haiñ tarannum-afshāñ

ḳhvāhisheñ dekhīñ haiñ mahrūm-e-zabāñ bhī ham ne

ab nazar aa.e haiñ āsūda-e-manzil to kyā

dekhī kyā kyā tapish-e-reg-e-ravāñ bhī ham ne

KHud ko samjha hai faqat wahm-o-guman bhi hum ne

KHud ko paya hai dil-e-kaun-o-makan bhi hum ne

dekh phulon se lade dhup nahae hue peD

hans ke kahte hain guzari hai KHizan bhi hum ne

shafaq-e-subh se tabinda saman-zar se puchh

raat kaTi su-e-gardun-nigran bhi hum ne

dekh kar abr bhar aai hain KHushi se aankhen

sukhte honTon pe pheri hai zaban bhi hum ne

jin ke giton mein hai nikhat ki lapak phul ka ras

salha-sal suni un ki fughan bhi hum ne

ab umangen hain tarangen hain tarannum-afshan

KHwahishen dekhin hain mahrum-e-zaban bhi hum ne

ab nazar aae hain aasuda-e-manzil to kya

dekhi kya kya tapish-e-reg-e-rawan bhi hum ne