KHud lafz pas-e-lafz kabhi dekh sake bhi

ḳhud lafz pas-e-lafz kabhī dekh sake bhī

kāġhaz kī ye dīvār kisī tarah gire bhī

kis dard se raushan hai siyah-ḳhāna-e-hastī

sūraj nazar aatā hai hameñ raat ga.e bhī

vo ham ki ġhurūr-e-saf-e-ādā-shiknī the

āḳhir sar-e-bāzār hue ḳhvār bike bhī

bahtī haiñ rag o pai meñ do-ābe kī havā.eñ

ik aur samundar hai samundar se pare bhī

aḳhlāq o sharāfat kā añdherā hai vo ghar meñ

jalte nahīñ ma.asūm gunāhoñ ke diye bhī

KHud lafz pas-e-lafz kabhi dekh sake bhi

kaghaz ki ye diwar kisi tarah gire bhi

kis dard se raushan hai siyah-KHana-e-hasti

suraj nazar aata hai hamein raat gae bhi

wo hum ki ghurur-e-saf-e-ada-shikni the

aaKHir sar-e-bazar hue KHwar bike bhi

bahti hain rag o pai mein do-abe ki hawaen

ek aur samundar hai samundar se pare bhi

aKHlaq o sharafat ka andhera hai wo ghar mein

jalte nahin masum gunahon ke diye bhi