KHud par jo etimad tha jhuTa nikal gaya

ḳhud par jo e'timād thā jhūTā nikal gayā

dariyā mire qayās se gahrā nikal gayā

shāyad batā diyā thā kisī ne mirā pata

mīloñ mirī talāsh meñ rasta nikal gayā

sūraj ġhurūb hote hī tanhā hue shajar

jaane kahāñ añdheroñ meñ saaya nikal gayā

dāman ke chaak siine ko baiThe haiñ jab bhī ham

kyuuñ baar baar suuī se dhāgā nikal gayā

kuchh aur baḌh ga.ī haiñ shajar kī udāsiyāñ

shāḳhoñ se aaj phir koī pattā nikal gayā

pahle to bas lahū pe ye ilzām thā magar

ab āñsuoñ kā rañg bhī kachchā nikal gayā

ab to safar kā koī bhī maqsad nahīñ rahā

ye kyā huā ki paañv kā kāñTā nikal gayā

ye ahl-e-bazm kis liye ḳhāmosh ho ga.e

tauba mirī zabān se ye kyā nikal gayā

KHud par jo e'timad tha jhuTa nikal gaya

dariya mere qayas se gahra nikal gaya

shayad bata diya tha kisi ne mera pata

milon meri talash mein rasta nikal gaya

suraj ghurub hote hi tanha hue shajar

jaane kahan andheron mein saya nikal gaya

daman ke chaak sine ko baiThe hain jab bhi hum

kyun bar bar sui se dhaga nikal gaya

kuchh aur baDh gai hain shajar ki udasiyan

shaKHon se aaj phir koi patta nikal gaya

pahle to bas lahu pe ye ilzam tha magar

ab aansuon ka rang bhi kachcha nikal gaya

ab to safar ka koi bhi maqsad nahin raha

ye kya hua ki panw ka kanTa nikal gaya

ye ahl-e-bazm kis liye KHamosh ho gae

tauba meri zaban se ye kya nikal gaya