KHud pukaregi jo manzil to Thahar jaunga

ḳhud pukāregī jo manzil to Thahar jā.ūñgā

varna ḳhuddār musāfir huuñ guzar jā.ūñgā

āñdhiyoñ kā mujhe kyā ḳhauf maiñ patthar Thahrā

ret kā Dher nahīñ huuñ jo bikhar jā.ūñgā

zindagī apnī kitāboñ meñ chhupā le varna

tere aurāq ke mānind bikhar jā.ūñgā

maiñ huuñ ab tere ḳhayālāt kā ik aks-e-jamīl

ā.īna-ḳhāne se niklā to kidhar jā.ūñgā

mujh ko hālāt meñ uljhā huā rahne de yūñhī

maiñ tirī zulf nahīñ huuñ jo sañvar jā.ūñgā

tez-raftār sahī laakh mirā azm-e-safar

vaqt āvāz jo degā to Thahar jā.ūñgā

dam na lene kī qasam khaa.ī hai maiñ ne 'razmī'

mujh ko manzil bhī pukāre to guzar jā.ūñgā

KHud pukaregi jo manzil to Thahar jaunga

warna KHuddar musafir hun guzar jaunga

aandhiyon ka mujhe kya KHauf main patthar Thahra

ret ka Dher nahin hun jo bikhar jaunga

zindagi apni kitabon mein chhupa le warna

tere auraq ke manind bikhar jaunga

main hun ab tere KHayalat ka ek aks-e-jamil

aaina-KHane se nikla to kidhar jaunga

mujh ko haalat mein uljha hua rahne de yunhi

main teri zulf nahin hun jo sanwar jaunga

tez-raftar sahi lakh mera azm-e-safar

waqt aawaz jo dega to Thahar jaunga

dam na lene ki qasam khai hai main ne 'razmi'

mujh ko manzil bhi pukare to guzar jaunga