khula na mujhse tabiat ka tha bahut gahra

khulā na mujh se tabī.at kā thā bahut gahrā

hazār us se rahā rābta bahut gahrā

bas is qadar ki ye hijrat kī umr kaT jaa.e

na mujh ġharīb se rakh silsila bahut gahrā

sab apne ā.īne us ne mujhī ko sauñp diye

use shikast kā ehsās thā bahut gahrā

mujhe tilism samajhtā thā vo sarāboñ kā

baḌhā jo aage samundar milā bahut gahrā

shadīd pyaas ke aalam meñ Dūbne se bachā

qadah to kyā mujhe qatra lagā bahut gahrā

tū us kī zad meñ jo aayā to Duub jā.egā

ba-qadr-e-āb hai har aa.ina bahut gahrā

mileñge raah meñ tujh ko charāġh jalte hue

kahīñ kahīñ hai mirā naqsh-e-pā bahut gahrā

talāsh-e-ma.ani-e-maqsūd itnī sahl na thī

maiñ lafz lafz utartā gayā bahut gahrā

jo baat jān-e-suḳhan thī vahī rahī ojhal

liyā to us ne mirā jā.eza bahut gahrā

qadīm hote hue mujh se bhī jadīd hai vo

asar hai us pe mire daur kā bahut gahrā

'fazā' hameñ to hai kaafī yahī ḳhumār-e-vajūd

hai be-sharāb bhī hāsil nasha bahut gahrā

khula na mujh se tabiat ka tha bahut gahra

hazar us se raha rabta bahut gahra

bas is qadar ki ye hijrat ki umr kaT jae

na mujh gharib se rakh silsila bahut gahra

sab apne aaine us ne mujhi ko saunp diye

use shikast ka ehsas tha bahut gahra

mujhe tilism samajhta tha wo sarabon ka

baDha jo aage samundar mila bahut gahra

shadid pyas ke aalam mein Dubne se bacha

qadah to kya mujhe qatra laga bahut gahra

tu us ki zad mein jo aaya to Dub jaega

ba-qadr-e-ab hai har aaina bahut gahra

milenge rah mein tujh ko charagh jalte hue

kahin kahin hai mera naqsh-e-pa bahut gahra

talash-e-mani-e-maqsud itni sahl na thi

main lafz lafz utarta gaya bahut gahra

jo baat jaan-e-suKHan thi wahi rahi ojhal

liya to us ne mera jaeza bahut gahra

qadim hote hue mujh se bhi jadid hai wo

asar hai us pe mere daur ka bahut gahra

'faza' hamein to hai kafi yahi KHumar-e-wajud

hai be-sharab bhi hasil nasha bahut gahra