kis nae KHwab mein rahta hun Duboya hua main

kis na.e ḳhvāb meñ rahtā huuñ Duboyā huā maiñ

ek muddat huī jaagā nahīñ soyā huā maiñ

merī sūraj se mulāqāt bhī ho saktī hai

sūkhne Daal diyā jā.ūñ jo dhoyā huā maiñ

mujhe bāhar nahīñ sāmān ke andar DhūñDo

mil bhī saktā huuñ kisī shai meñ samoyā huā maiñ

bāzyābī kī tavaqqo hī kisī ko nahīñ ab

apnī duniyā meñ huuñ is tarah se khoyā huā maiñ

shaam kī āḳhirī aahaT pe dahaltā huā dil

sub.h kī pahlī havāoñ meñ bhigoyā huā maiñ

āsmāñ par koī koñpal sā nikal ā.ūñgā

sāl-hā-sāl se is ḳhaak meñ boyā huā maiñ

kabhī chāhūñ bhī to ab jā bhī kahāñ saktā huuñ

is tarah se tire kāñTe meñ piroyā huā maiñ

mere kahne ke liye baat na.ī thī na koī

kah ke chup ho ga.e sab log to goyā huā maiñ

muskurāte hue miltā huuñ kisī se jo 'zafar'

saaf pahchān liyā jaatā huuñ royā huā maiñ

kis nae KHwab mein rahta hun Duboya hua main

ek muddat hui jaga nahin soya hua main

meri suraj se mulaqat bhi ho sakti hai

sukhne Dal diya jaun jo dhoya hua main

mujhe bahar nahin saman ke andar DhunDo

mil bhi sakta hun kisi shai mein samoya hua main

bazyabi ki tawaqqo hi kisi ko nahin ab

apni duniya mein hun is tarah se khoya hua main

sham ki aaKHiri aahaT pe dahalta hua dil

subh ki pahli hawaon mein bhigoya hua main

aasman par koi konpal sa nikal aaunga

sal-ha-sal se is KHak mein boya hua main

kabhi chahun bhi to ab ja bhi kahan sakta hun

is tarah se tere kanTe mein piroya hua main

mere kahne ke liye baat nai thi na koi

kah ke chup ho gae sab log to goya hua main

muskuraate hue milta hun kisi se jo 'zafar'

saf pahchan liya jata hun roya hua main