kis tarah milen koi bahana nahin milta
kis tarah mileñ koī bahānā nahīñ miltā
ham jā nahīñ sakte unheñ aanā nahīñ miltā
phirte haiñ vahāñ aap bhaTaktī hai yahāñ ruuh
ab gor meñ bhī ham ko Thikānā nahīñ miltā
badnām kiyā hai tan-e-anvar kī safā ne
dil meñ bhī use raaz chhupānā nahīñ miltā
daulat nahīñ kaam aatī jo taqdīr burī ho
qārūn ko bhī apnā ḳhazānā nahīñ miltā
āñkheñ vo dikhāte haiñ nikal jaa.e agar baat
bosa to kahāñ hoñT hilānā nahīñ miltā
tāqat vo kahāñ jaa.eñ tasavvur meñ jo ai 'barq'
barsoñ se hameñ hosh meñ aanā nahīñ miltā
kis tarah milen koi bahana nahin milta
hum ja nahin sakte unhen aana nahin milta
phirte hain wahan aap bhaTakti hai yahan ruh
ab gor mein bhi hum ko Thikana nahin milta
badnam kiya hai tan-e-anwar ki safa ne
dil mein bhi use raaz chhupana nahin milta
daulat nahin kaam aati jo taqdir buri ho
qarun ko bhi apna KHazana nahin milta
aankhen wo dikhate hain nikal jae agar baat
bosa to kahan honT hilana nahin milta
taqat wo kahan jaen tasawwur mein jo ai 'barq'
barson se hamein hosh mein aana nahin milta
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
