kise majal jo Toke meri uDanon ko

kise majāl jo Toke mirī uḌānoñ ko

maiñ ḳhāksār samajhtā huuñ āsmānoñ ko

sanad ḳhulūs kī māñge na mujh se mustaqbil

maiñ saath le ke chalā huuñ ga.e zamānoñ ko

zamīn bik ga.ī saarī adū ke paas mirī

duā.eñ detā huuñ maiñ aap ke lagānoñ ko

nazar kī had meñ simaT aa.e ajnabī chehre

talāsh karne jo niklā maiñ mehrbānoñ ko

sameT le ga.e sab rahmateñ kahāñ mehmān

makān kāTtā phirtā hai mezbānoñ ko

maiñ sañg-e-mīl ke reze sambhāl luuñ 'sāqib'

safar kī laaj samajhtā huuñ in nishānoñ ko

kise majal jo Toke meri uDanon ko

main KHaksar samajhta hun aasmanon ko

sanad KHulus ki mange na mujh se mustaqbil

main sath le ke chala hun gae zamanon ko

zamin bik gai sari adu ke pas meri

duaen deta hun main aap ke laganon ko

nazar ki had mein simaT aae ajnabi chehre

talash karne jo nikla main mehrbanon ko

sameT le gae sab rahmaten kahan mehman

makan kaTta phirta hai mezbanon ko

main sang-e-mil ke reze sambhaal lun 'saqib'

safar ki laj samajhta hun in nishanon ko