kisi girdab ki phenki paDi hai

kisī girdāb kī pheñkī paḌī hai

lab-e-sāhil jo ik kashtī paḌī hai

haqīqat meñ vahī sīdhī paḌī hai

mujhe ik chaal jo ulTī paḌī hai

safar uljhā diye haiñ us ne saare

mire pairoñ meñ jo tezī paḌī hai

vo hañgāma guzar jaatā udhar se

magar raste meñ ḳhāmoshī paḌī hai

mire kānoñ kī zad par haiñ manāzir

mirī āñkhoñ meñ sargoshī paḌī hai

huā hai qatl bedārī kā jab se

ye bastī raat din soī paḌī hai

ye misra maiñ adhūrā chhoḌtā huuñ

mire baste meñ ik taḳhtī paḌī hai

patañg kaTne kā baa.is aur hai kuchh

agarche Dor bhī uljhī paḌī hai

zarā koyal kā piñjra khul gayā thā

abhī tak ḳhauf se sahmī paḌī hai

mukammal ek duniyā aur bhī hai

jo ik duniyā kī an-dekhī paḌī hai

baḌī banjar thī ye khetī 'liyāqat'

magar kuchh roz se sīñchī paḌī hai

kisi girdab ki phenki paDi hai

lab-e-sahil jo ek kashti paDi hai

haqiqat mein wahi sidhi paDi hai

mujhe ek chaal jo ulTi paDi hai

safar uljha diye hain us ne sare

mere pairon mein jo tezi paDi hai

wo hangama guzar jata udhar se

magar raste mein KHamoshi paDi hai

mere kanon ki zad par hain manazir

meri aankhon mein sargoshi paDi hai

hua hai qatl bedari ka jab se

ye basti raat din soi paDi hai

ye misra main adhura chhoDta hun

mere baste mein ek taKHti paDi hai

patang kaTne ka bais aur hai kuchh

agarche Dor bhi uljhi paDi hai

zara koyal ka pinjra khul gaya tha

abhi tak KHauf se sahmi paDi hai

mukammal ek duniya aur bhi hai

jo ek duniya ki an-dekhi paDi hai

baDi banjar thi ye kheti 'liyaqat'

magar kuchh roz se sinchi paDi hai