koi samjhao dariya ki rawani kaTti hai

koī samjhāo dariyā kī ravānī kāTtī hai

ki mere saañs ko tishna-dahānī kāTtī hai

maiñ bāhar to bahut achchhā huuñ par andar hī andar

mujhe koī balā-e-nā-gahānī kāTtī hai

maiñ dariyā huuñ magar kitnā satāyā jā rahā huuñ

ki bastī roz aa ke merā paanī kāTtī hai

zamīñ par huuñ magar kaT kaT ke girtā jā rahā huuñ

musalsal ik nigāh-e-āsmānī kāTtī hai

maiñ kuchh din se achānak phir akelā paḌ gayā huuñ

na.e mausam meñ ik vahshat purānī kāTtī hai

ki raaja mar chukā hai aur shahzāde javāñ haiñ

ye raanī kis tarah apnī javānī kāTtī hai

nazar vaalo tumhārī aañkh se shikva hai mujh ko

zabāñ vaalo tumhārī be-zabānī kāTtī hai

koi samjhao dariya ki rawani kaTti hai

ki mere sans ko tishna-dahani kaTti hai

main bahar to bahut achchha hun par andar hi andar

mujhe koi bala-e-na-gahani kaTti hai

main dariya hun magar kitna sataya ja raha hun

ki basti roz aa ke mera pani kaTti hai

zamin par hun magar kaT kaT ke girta ja raha hun

musalsal ek nigah-e-asmani kaTti hai

main kuchh din se achanak phir akela paD gaya hun

nae mausam mein ek wahshat purani kaTti hai

ki raja mar chuka hai aur shahzade jawan hain

ye rani kis tarah apni jawani kaTti hai

nazar walo tumhaari aankh se shikwa hai mujh ko

zaban walo tumhaari be-zabani kaTti hai