koi wajud hai duniya mein koi parchhain

koī vajūd hai duniyā meñ koī parchhā.īñ

so har koī nahīñ hotā kisī kī parchhā.īñ

mire vajūd ko maano to saath chaltā huuñ

ki maiñ to ban na sakūñgā tumhārī parchhā.īñ

yahī charāġh hai sab kuchh ki dil kaheñ jis ko

agar ye bujh gayā to aadmī bhī parchhā.īñ

ka.ī dinoñ se mire saath saath chaltī hai

koī udaas sī ThanDī sī koī parchhā.īñ

maiñ apnā-āp samajhtā rahā jise tā-umr

vo mere jaisā hayūlā thā merī parchhā.īñ

na ḳhush ho koī bhī tezī se baḌhtī qāmat par

pas-e-ġhurūb na hogī bichārī parchhā.īñ

gumān-e-hast hai hastī kā ā.īna-ḳhāna

so apne-āp ko bhī jaan apnī parchhā.īñ

maiñ nisf sach kī tarah huuñ bhī aur nahīñ bhī huuñ

ki aadhā jism hai merā to aadhī parchhā.īñ

phir us se us ke taġhāful kā kyā gila karnā

ki 'iftiḳhār-muġhal' vo to thī hī parchhā.īñ

koi wajud hai duniya mein koi parchhain

so har koi nahin hota kisi ki parchhain

mere wajud ko mano to sath chalta hun

ki main to ban na sakunga tumhaari parchhain

yahi charagh hai sab kuchh ki dil kahen jis ko

agar ye bujh gaya to aadmi bhi parchhain

kai dinon se mere sath sath chalti hai

koi udas si ThanDi si koi parchhain

main apna-ap samajhta raha jise ta-umr

wo mere jaisa hayula tha meri parchhain

na KHush ho koi bhi tezi se baDhti qamat par

pas-e-ghurub na hogi bichaari parchhain

guman-e-hast hai hasti ka aaina-KHana

so apne-ap ko bhi jaan apni parchhain

main nisf sach ki tarah hun bhi aur nahin bhi hun

ki aadha jism hai mera to aadhi parchhain

phir us se us ke taghaful ka kya gila karna

ki 'iftiKHar-mughal' wo to thi hi parchhain