kuchh kahun kahna jo mera kijiye

kuchh kahūñ kahnā jo merā kījiye

chāhne vaale ko chāhā kījiye

hausla teġh-e-jafā kā rah na jaa.e

aa.iye ḳhūn-e-tamannā kījiye

fitna-e-roz-e-qayāmat hai vo chaal

aaj vo aate haiñ dekhā kījiye

kis ko dekhā un kī sūrat dekh kar

jī meñ aatā hai ki sajda kījiye

fitne sab barpā kiye haiñ husn ne

merī ulfat ko na rusvā kījiye

hūr-e-jannat un se kuchh baḌh kar sahī

ek dil kyā kyā tamannā kījiye

kar diyā hairat ne mujh ko aa.ina

be-takalluf muñh dikhāyā kījiye

josh meñ aa jaa.e rahmat kī tarah

ek ik qatre ko dariyā kījiye

naam agar darkār hai misl-e-nagīñ

ek ghar meñ jam ke baiThā kījiye

mil chuke ab milne vaale ḳhaak ke

qabr par jā jā ke royā kījiye

kaun thā kal bā.is-e-be-pardagī

aap mujh se aaj parda kījiye

kal kī bātoñ meñ to kuchh narmī sī hai

aaj phir qāsid ravānā kījiye

raah takte takte 'āsī' chal basā

kyuuñ kisī se aap vaadā kījiye

kuchh kahun kahna jo mera kijiye

chahne wale ko chaha kijiye

hausla tegh-e-jafa ka rah na jae

aaiye KHun-e-tamanna kijiye

fitna-e-roz-e-qayamat hai wo chaal

aaj wo aate hain dekha kijiye

kis ko dekha un ki surat dekh kar

ji mein aata hai ki sajda kijiye

fitne sab barpa kiye hain husn ne

meri ulfat ko na ruswa kijiye

hur-e-jannat un se kuchh baDh kar sahi

ek dil kya kya tamanna kijiye

kar diya hairat ne mujh ko aaina

be-takalluf munh dikhaya kijiye

josh mein aa jae rahmat ki tarah

ek ek qatre ko dariya kijiye

nam agar darkar hai misl-e-nagin

ek ghar mein jam ke baiTha kijiye

mil chuke ab milne wale KHak ke

qabr par ja ja ke roya kijiye

kaun tha kal bais-e-be-pardagi

aap mujh se aaj parda kijiye

kal ki baaton mein to kuchh narmi si hai

aaj phir qasid rawana kijiye

rah takte takte 'asi' chal basa

kyun kisi se aap wada kijiye