kuchh tabiat aaj-kal pata hun ghabrai hui

kuchh tabī'at āj-kal paatā huuñ ghabrā.ī huī

shahr bhar meñ hai udāsī har taraf chhā.ī huī

hā.e-re ġhārat-gar-e-sabr-o-shakebā.ī huī

vo tirī tirchhī nazar vo aañkh sharmā.ī huī

ai sabā chaltī hai kyuuñ is darja itrā.ī huī

kyā nahīñ hai tū vahī us gul kī Thukrā.ī huī

vasl meñ achchhī tarah jab bāda-paimā.ī huī

uḌ ga.ī kāfūr ban ban kar hayā aa.ī huī

shab ko jab abrū-o-mizhgāñ kī saf-ārā.ī huī

shoḳhiyoñ meñ dab ga.ī sharm-o-hayā aa.ī huī

haa.e merī be-qarārī aur un kā iztirāb

aur chalte vaqt kī bāteñ vo ghabrā.ī huī

qabr tak pahūñchā ga.e saare azīz-o-aqribā

aage aage phir rafīq-e-rāh tanhā.ī huī

haañ tumhīñ par jaan detā huuñ tumhīñ par huuñ nisār

haañ tumhīñ par hai tabī'at TuuT kar aa.ī huī

TukḌe TukḌe haiñ jigar ke shīsha-e-dil chūr-chūr

ye qayāmat hai tumhārī chaal kī Dhaa.ī huī

jis meñ tāqat hai na harakat hai na ḳhvāhish hai na jaañ

dil nahīñ ik laash hai siine meñ dafnā.ī huī

baiThte hī baiThte mahfil meñ be-ḳhud ho gayā

dekhte hī dekhte ruḳhsat tavānā.ī huī

ḳhuub rone do ki ye roke se ruk saktā nahīñ

mere dil par hai abhī ġham kī ghaTā chhā.ī huī

ābdīda ho ke vo aapas meñ kahnā alvidāa'

us kī kam merī sivā āvāz bharrā.ī huī

minnateñ kartā huuñ dar-guzro ḳhudārā baḳhsh do

ab to nādānī huī yā mujh se dānā.ī huī

shikva-e-va.ada-ḳhilāfī kā milā achchhā javāb

peshgī rakkhī thī ik ummīd bar aa.ī huī

huur par merī tabī'at aa.e kyā maqdūr hai

tauba tauba ye bhī terī tarah harjā.ī huī

ḳhud hī socho dekhne vāloñ kā is meñ kyā qusūr

jab tamāshā tum hue ḳhilqat tamāshā.ī huī

rote rote Thahr jaatā huuñ tirī sar kī qasam

yaad aa jaatī hai jab vo baat samjhā.ī huī

de ke dil ġhusse meñ vāpas un ko pachhtānā paḌā

kyā raqam jaatī rahī hai haath se aa.ī huī

ḳhush-nasībī us jagah kī tū jahāñ rakkhe qadam

rail bhī phirtī hai station par itrā.ī huī

jab kahā us ne ki martā huuñ to kosā is tarah

tujh ko aa.e yā-ilāhī ġhair kī aa.ī huī

rabt baḌhne par khulā kartā hai kuchh achchhā burā

is se kyā hotā hai gar rasmī shanāsā.ī huī

'ishq-bāzī aur shai hai fisq hai kuchh aur chiiz

nek-nāmī ko na kah 'parvīñ' ki rusvā.ī huī

kuchh tabi'at aaj-kal pata hun ghabrai hui

shahr bhar mein hai udasi har taraf chhai hui

hae-re ghaarat-gar-e-sabr-o-shakebai hui

wo teri tirchhi nazar wo aankh sharmai hui

ai saba chalti hai kyun is darja itrai hui

kya nahin hai tu wahi us gul ki Thukrai hui

wasl mein achchhi tarah jab baada-paimai hui

uD gai kafur ban ban kar haya aai hui

shab ko jab abru-o-mizhgan ki saf-arai hui

shoKHiyon mein dab gai sharm-o-haya aai hui

hae meri be-qarari aur un ka iztirab

aur chalte waqt ki baaten wo ghabrai hui

qabr tak pahuncha gae sare aziz-o-aqriba

aage aage phir rafiq-e-rah tanhai hui

han tumhin par jaan deta hun tumhin par hun nisar

han tumhin par hai tabi'at TuT kar aai hui

TukDe TukDe hain jigar ke shisha-e-dil chur-chur

ye qayamat hai tumhaari chaal ki Dhai hui

jis mein taqat hai na harakat hai na KHwahish hai na jaan

dil nahin ek lash hai sine mein dafnai hui

baiThte hi baiThte mahfil mein be-KHud ho gaya

dekhte hi dekhte ruKHsat tawanai hui

KHub rone do ki ye roke se ruk sakta nahin

mere dil par hai abhi gham ki ghaTa chhai hui

aabdida ho ke wo aapas mein kahna alwidaa'

us ki kam meri siwa aawaz bharrai hui

minnaten karta hun dar-guzro KHudara baKHsh do

ab to nadani hui ya mujh se danai hui

shikwa-e-wada-KHilafi ka mila achchha jawab

peshgi rakkhi thi ek ummid bar aai hui

hur par meri tabi'at aae kya maqdur hai

tauba tauba ye bhi teri tarah harjai hui

KHud hi socho dekhne walon ka is mein kya qusur

jab tamasha tum hue KHilqat tamashai hui

rote rote Thahr jata hun teri sar ki qasam

yaad aa jati hai jab wo baat samjhai hui

de ke dil ghusse mein wapas un ko pachhtana paDa

kya raqam jati rahi hai hath se aai hui

KHush-nasibi us jagah ki tu jahan rakkhe qadam

rail bhi phirti hai station par itrai hui

jab kaha us ne ki marta hun to kosa is tarah

tujh ko aae ya-ilahi ghair ki aai hui

rabt baDhne par khula karta hai kuchh achchha bura

is se kya hota hai gar rasmi shanasai hui

'ishq-bazi aur shai hai fisq hai kuchh aur chiz

nek-nami ko na kah 'parwin' ki ruswai hui