kya jaaniye manzil hai kahan jate hain kis samt

kyā jāniye manzil hai kahāñ jaate haiñ kis samt

bhaTkī huī is bhiiḌ meñ sab soch rahe haiñ

bhīgī huī ik shaam kī dahlīz pe baiThe

ham dil ke sulagne kā sabab soch rahe haiñ

TuuTe hue pattoñ se daraḳhtoñ kā ta'alluq

ham duur khaḌe kunj-e-tarab soch rahe haiñ

bujhtī huī sham.oñ kā dhuāñ hai sar-e-mahfil

kyā rang jame āḳhir-e-shab soch rahe haiñ

is lahr ke pīchhe bhī ravāñ haiñ na.ī lahreñ

pahle nahīñ sochā thā jo ab soch rahe haiñ

ham ubhre bhī Duube bhī siyāhī ke bhañvar meñ

ham so.e nahīñ shab-hama-shab soch rahe haiñ

kya jaaniye manzil hai kahan jate hain kis samt

bhaTki hui is bhiD mein sab soch rahe hain

bhigi hui ek sham ki dahliz pe baiThe

hum dil ke sulagne ka sabab soch rahe hain

TuTe hue patton se daraKHton ka ta'alluq

hum dur khaDe kunj-e-tarab soch rahe hain

bujhti hui shamon ka dhuan hai sar-e-mahfil

kya rang jame aaKHir-e-shab soch rahe hain

is lahr ke pichhe bhi rawan hain nai lahren

pahle nahin socha tha jo ab soch rahe hain

hum ubhre bhi Dube bhi siyahi ke bhanwar mein

hum soe nahin shab-hama-shab soch rahe hain