kya karwan-e-hasti guzra rawa-rawi mein

kyā kārvān-e-hastī guzrā ravā-ravī meñ

fardā ko maiñ ne dekhā gard-o-ġhubār-e-dī meñ

the mahv lāla-o-gul kis kaif-e-be-ḳhudī meñ

zaḳhm-e-jigar ke Tāñke TuuTe hañsī hañsī meñ

yārān-e-bazm-e-ishrat DhūñDūñ kahāñ maiñ tum ko

tāroñ kī chhāñv meñ yā pichhle kī chāñdnī meñ

har uqda meñ jahāñ ke poshīda hai kashākash

hai mauj-e-ḳhanda-e-gul pinhāñ kalī kalī meñ

zaḳhmoñ meñ ḳhud chamak hai aur us pe ye sitam hai

rañg-e-parīdañ se maiñ rahtā huuñ chāñdnī meñ

ham kis shumār meñ the pursish jo ham se hotī

ye imtiyāz paayā āshob-e-āgahī meñ

hukm-e-qazā ho jaisā sarzad ho fe.al vaisā

banda kā daḳhl bhī hai phir is kahī badī meñ

raftār-e-sāya ko hai past-o-buland yaksāñ

Thokar kabhī na khaa.e rāh-e-farotanī meñ

vajd aa gayā falak ko ġhash aa gayā zamīñ ko

do tarah ke asar the ik saut-e-sarmadī meñ

ta.abīr us kī shāyad ek vāpsīñ nafas ho

jo ḳhvāb dekhte the ham saarī zindagī meñ

laa.ī hubāb tak ko sail-e-fanā bahā kar

ik aah khīñchne ko ik dam kī zindagī meñ

mahshar kī āfatoñ kā dhaḌkā nahīñ rahā ab

sau hashr maiñ ne dekhe do din kī zindagī meñ

pahlū meñ tū ho ai dil phir hasrateñ hazāroñ

kis baat kī kamī hai terī salāmtī meñ

pursān-e-hāl vo ho aur sāmne bulā kar

kyā jāniye zabāñ se kyā nikle be-ḳhudī meñ

tū ek zill-e-hastī phir kaisī ḳhud-parastī

saaya kī parvarish hai dāmān-e-be-ḳhudī meñ

haa.el bas ik nafas hai mahshar meñ aur ham meñ

parda habāb kā hai fardā meñ aur dī meñ

āñkheñ dikhā rahī hai din se mujhe shab-e-ġham

āsār tīrgī ke haiñ din kī raushnī meñ

tū ne to apne dar se mujh ko uThā diyā hai

parchhā.īñ phir rahī hai merī usī galī meñ

sajda kā hukm mujh ko tū ne to ab diyā hai

pahle hī likh chukā huuñ maiñ ḳhatt-e-bandgī meñ

ai 'nazm' chheḌ kar ham tujh ko hue pashemāñ

kyā jānte the zālim ro degā dil-lagī meñ

kya karwan-e-hasti guzra rawa-rawi mein

farda ko main ne dekha gard-o-ghubar-e-di mein

the mahw lala-o-gul kis kaif-e-be-KHudi mein

zaKHm-e-jigar ke Tanke TuTe hansi hansi mein

yaran-e-bazm-e-ishrat DhunDun kahan main tum ko

taron ki chhanw mein ya pichhle ki chandni mein

har uqda mein jahan ke poshida hai kashakash

hai mauj-e-KHanda-e-gul pinhan kali kali mein

zaKHmon mein KHud chamak hai aur us pe ye sitam hai

rang-e-paridan se main rahta hun chandni mein

hum kis shumar mein the pursish jo hum se hoti

ye imtiyaz paya aashob-e-agahi mein

hukm-e-qaza ho jaisa sarzad ho feal waisa

banda ka daKHl bhi hai phir is kahi badi mein

raftar-e-saya ko hai past-o-buland yaksan

Thokar kabhi na khae rah-e-farotani mein

wajd aa gaya falak ko ghash aa gaya zamin ko

do tarah ke asar the ek saut-e-sarmadi mein

tabir us ki shayad ek wapsin nafas ho

jo KHwab dekhte the hum sari zindagi mein

lai hubab tak ko sail-e-fana baha kar

ek aah khinchne ko ek dam ki zindagi mein

mahshar ki aafaton ka dhaDka nahin raha ab

sau hashr main ne dekhe do din ki zindagi mein

pahlu mein tu ho ai dil phir hasraten hazaron

kis baat ki kami hai teri salamti mein

pursan-e-haal wo ho aur samne bula kar

kya jaaniye zaban se kya nikle be-KHudi mein

tu ek zill-e-hasti phir kaisi KHud-parasti

saya ki parwarish hai daman-e-be-KHudi mein

hael bas ek nafas hai mahshar mein aur hum mein

parda habab ka hai farda mein aur di mein

aankhen dikha rahi hai din se mujhe shab-e-gham

aasar tirgi ke hain din ki raushni mein

tu ne to apne dar se mujh ko uTha diya hai

parchhain phir rahi hai meri usi gali mein

sajda ka hukm mujh ko tu ne to ab diya hai

pahle hi likh chuka hun main KHatt-e-bandgi mein

ai 'nazm' chheD kar hum tujh ko hue pasheman

kya jaante the zalim ro dega dil-lagi mein