kya kahiye ki ab uski sada tak nahin aati

kyā kahiye ki ab us kī sadā tak nahīñ aatī

ūñchī hoñ fasīleñ to havā tak nahīñ aatī

shāyad hī koī aa sake is moḌ se aage

is moḌ se aage to qazā tak nahīñ aatī

vo gul na rahe nik.hat-e-gul ḳhaak milegī

ye soch ke gulshan meñ sabā tak nahīñ aatī

is shor-e-talātum meñ koī kis ko pukāre

kānoñ meñ yahāñ apnī sadā tak nahīñ aatī

ḳhuddār huuñ kyuuñ aa.uuñ dar-e-ahl-e-karam par

khetī kabhī ḳhud chal ke ghaTā tak nahīñ aatī

us dasht meñ qadmoñ ke nishāñ DhūñDh rahe ho

peḌoñ se jahāñ chhan ke ziyā tak nahīñ aatī

yā jaate hue mujh se lipaT jaatī thiiñ shāḳheñ

yā mere bulāne se sabā tak nahīñ aatī

kyā ḳhushk huā raushniyoñ kā vo samundar

ab koī kiran ābla-pā tak nahīñ aatī

chhup chhup ke sadā jhāñktī haiñ ḳhalvat-e-gul meñ

mahtāb kī kirnoñ ko hayā tak nahīñ aatī

ye kaun batā.e adam-ābād hai kaisā

TuuTī huī qabroñ se sadā tak nahīñ aatī

behtar hai palaT jaao siyah-ḳhāna-e-ġham se

is sard guphā meñ to havā tak nahīñ aatī

kya kahiye ki ab us ki sada tak nahin aati

unchi hon fasilen to hawa tak nahin aati

shayad hi koi aa sake is moD se aage

is moD se aage to qaza tak nahin aati

wo gul na rahe nikhat-e-gul KHak milegi

ye soch ke gulshan mein saba tak nahin aati

is shor-e-talatum mein koi kis ko pukare

kanon mein yahan apni sada tak nahin aati

KHuddar hun kyun aaun dar-e-ahl-e-karam par

kheti kabhi KHud chal ke ghaTa tak nahin aati

us dasht mein qadmon ke nishan DhunDh rahe ho

peDon se jahan chhan ke ziya tak nahin aati

ya jate hue mujh se lipaT jati thin shaKHen

ya mere bulane se saba tak nahin aati

kya KHushk hua raushniyon ka wo samundar

ab koi kiran aabla-pa tak nahin aati

chhup chhup ke sada jhankti hain KHalwat-e-gul mein

mahtab ki kirnon ko haya tak nahin aati

ye kaun batae adam-abaad hai kaisa

TuTi hui qabron se sada tak nahin aati

behtar hai palaT jao siyah-KHana-e-gham se

is sard gupha mein to hawa tak nahin aati