kya kahun ham-nashin ye mera bhag

kyā kahūñ ham-nashīñ ye merā bhaag

ek jaan aur saikḌoñ haiñ khaḌāg

phir kabhī mai se tauba kar lūñgā

ab to botal kā khul gayā hai kaag

dīda-o-dil kī nibh nahīñ saktī

is meñ paanī hai aur us meñ aag

kar ke vo zikr jaur Dhā.eñge

taar bolā ki ham ne būjhā raag

ab ḳhizāñ meñ kahāñ vo rañg-e-chaman

jald-tar luT gayā dulhan kā suhāg

muflisī meñ hai dil amīroñ kā

ham lañgoTī meñ khelte haiñ phaag

dil hamārā butoñ ko bhuul gayā

ab na kāshī nazar meñ hai na praag

chor se kah rahe haiñ chorī kar

aur vo kah rahe haiñ shaah se jaag

sho.ala-rū maiñ ne kyuuñ kahā un ko

aur bhī ho ga.e vo sun kar aag

bazm-e-aish-o-nashāt ho ga.ī ḳhatm

ab kahāñ rāgnī kahāñ vo raag

kyuuñ sañbhaltā nahīñ mizāj apnā

hai davā-o-maraz meñ shāyad laag

sab tire dost sab mire dushman

ik mirā baḳht ek terā bhaag

koī lahze ko bhī nahīñ ruktā

tausan-e-umr kī hai Dhīlī baag

qaul de kar tirā mukar jaanā

mujh se itnā lagāv itnī laag

hai jidhar merī manzil-e-maqsūd

maiñ udhar jā rahā huuñ bhāgā bhaag

maiñ ne dekhā ye bazm-e-ālam meñ

apnī Daflī hai aur apnā raag

mausam-e-gul abhī nahīñ aayā

chal diye ghar meñ ham lagā kar aag

roz malte haiñ muñh par apne bhabhūt

'ishq meñ ham ne le liyā bairāg

dil lagā kar mujhe huā mā'lūm

'ishq meñ haiñ baḌe baḌe se khaḌāg

in ko tūfān-e-ḳhalq se kyā Dar

hazrat-e-'nūh' haiñ purāne ghaag

kya kahun ham-nashin ye mera bhag

ek jaan aur saikDon hain khaDag

phir kabhi mai se tauba kar lunga

ab to botal ka khul gaya hai kag

dida-o-dil ki nibh nahin sakti

is mein pani hai aur us mein aag

kar ke wo zikr jaur Dhaenge

tar bola ki hum ne bujha rag

ab KHizan mein kahan wo rang-e-chaman

jald-tar luT gaya dulhan ka suhag

muflisi mein hai dil amiron ka

hum langoTi mein khelte hain phag

dil hamara buton ko bhul gaya

ab na kashi nazar mein hai na prag

chor se kah rahe hain chori kar

aur wo kah rahe hain shah se jag

shoala-ru main ne kyun kaha un ko

aur bhi ho gae wo sun kar aag

bazm-e-aish-o-nashat ho gai KHatm

ab kahan ragni kahan wo rag

kyun sanbhalta nahin mizaj apna

hai dawa-o-maraz mein shayad lag

sab tere dost sab mere dushman

ek mera baKHt ek tera bhag

koi lahze ko bhi nahin rukta

tausan-e-umr ki hai Dhili bag

qaul de kar tera mukar jaana

mujh se itna lagaw itni lag

hai jidhar meri manzil-e-maqsud

main udhar ja raha hun bhaga bhag

main ne dekha ye bazm-e-alam mein

apni Dafli hai aur apna rag

mausam-e-gul abhi nahin aaya

chal diye ghar mein hum laga kar aag

roz malte hain munh par apne bhabhut

'ishq mein hum ne le liya bairag

dil laga kar mujhe hua ma'lum

'ishq mein hain baDe baDe se khaDag

in ko tufan-e-KHalq se kya Dar

hazrat-e-'nuh' hain purane ghag