kya sarokar ab kisi se mujhe

kyā sarokār ab kisī se mujhe

vāsta thā to thā tujhī se mujhe

be-hisī kā bhī ab nahīñ ehsās

kyā huā terī be-ruḳhī se mujhe

maut kī aarzū bhī kar dekho

kyā ummīdeñ thiiñ zindagī se mujhe

phir kisī par na e'tibār aa.e

yuuñ utāro na apne jī se mujhe

terā ġham bhī na ho to kyā jiinā

kuchh tasallī hai dard hī se mujhe

kitnā purkār ho gayā huuñ ki thā

vāsta terī sādgī se mujhe

kar ga.e kis qadar tabāh 'ziyā'

dushman andāz-e-dostī se mujhe

kya sarokar ab kisi se mujhe

wasta tha to tha tujhi se mujhe

be-hisi ka bhi ab nahin ehsas

kya hua teri be-ruKHi se mujhe

maut ki aarzu bhi kar dekho

kya ummiden thin zindagi se mujhe

phir kisi par na e'tibar aae

yun utaro na apne ji se mujhe

tera gham bhi na ho to kya jina

kuchh tasalli hai dard hi se mujhe

kitna purkar ho gaya hun ki tha

wasta teri sadgi se mujhe

kar gae kis qadar tabah 'ziya'

dushman andaz-e-dosti se mujhe