kyun hijr ke shikwe karta hai kyun dard ke rone rota hai
kyun hijr ke shikwe karta hai kyun dard ke rone rota hai
Hafeez Jalandhari
MORE BYHafeez Jalandhari
kyuuñ hijr ke shikve kartā hai kyuuñ dard ke rone rotā hai
ab ishq kiyā to sabr bhī kar is meñ to yahī kuchh hotā hai
āġhāz-e-musībat hotā hai apne hī dil kī shāmat se
āñkhoñ meñ phuul khilātā hai talvoñ meñ kāñTe botā hai
ahbāb kā shikva kyā kījiye ḳhud zāhir o bātin ek nahīñ
lab uupar uupar hañste haiñ dil andar andar rotā hai
mallāhoñ ko ilzām na do tum sāhil vaale kyā jaano
ye tūfāñ kaun uThātā hai ye kashtī kaun Dubotā hai
kyā jāniye ye kyā kho.egā kyā jāniye ye kyā pā.egā
mandir kā pujārī jāgtā hai masjid kā namāzī sotā hai
ḳhairāt kī jannat Thukrā de hai shaan yahī ḳhuddārī kī
jannat se nikālā thā jis ko tū us aadam kā potā hai
kyun hijr ke shikwe karta hai kyun dard ke rone rota hai
ab ishq kiya to sabr bhi kar is mein to yahi kuchh hota hai
aaghaz-e-musibat hota hai apne hi dil ki shamat se
aankhon mein phul khilata hai talwon mein kanTe bota hai
ahbab ka shikwa kya kijiye KHud zahir o baatin ek nahin
lab upar upar hanste hain dil andar andar rota hai
mallahon ko ilzam na do tum sahil wale kya jaano
ye tufan kaun uThata hai ye kashti kaun Dubota hai
kya jaaniye ye kya khoega kya jaaniye ye kya paega
mandir ka pujari jagta hai masjid ka namazi sota hai
KHairaat ki jannat Thukra de hai shan yahi KHuddari ki
jannat se nikala tha jis ko tu us aadam ka pota hai
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
