kyun kisi aur ko dukh dard sunaun apne

kyuuñ kisī aur ko dukh dard sunā.ūñ apne

apnī āñkhoñ se bhī maiñ zaḳhm chhupā.ūñ apne

maiñ to qaa.em huuñ tire ġham kī badaulat varna

yuuñ bikhar jā.ūñ ki ḳhud haath na aa.uuñ apne

sher logoñ ke bahut yaad haiñ auroñ ke liye

tū mile to maiñ tujhe sher sunā.ūñ apne

tere raste kā jo kāñTā bhī mayassar aa.e

maiñ use shauq se collar par sajā.ūñ apne

sochtā huuñ ki bujhā duuñ meñ ye kamre kā diyā

apne saa.e ko bhī kyuuñ saath jagā.ūñ apne

us kī talvār ne vo chaal chalī hai ab ke

paañv kaTte haiñ agar haath bachā.ūñ apne

āḳhirī baat mujhe yaad hai us kī 'anvar'

jaane vaale ko gale se na lagā.ūñ apne

kyun kisi aur ko dukh dard sunaun apne

apni aankhon se bhi main zaKHm chhupaun apne

main to qaem hun tere gham ki badaulat warna

yun bikhar jaun ki KHud hath na aaun apne

sher logon ke bahut yaad hain auron ke liye

tu mile to main tujhe sher sunaun apne

tere raste ka jo kanTa bhi mayassar aae

main use shauq se collar par sajaun apne

sochta hun ki bujha dun mein ye kamre ka diya

apne sae ko bhi kyun sath jagaun apne

us ki talwar ne wo chaal chali hai ab ke

panw kaTte hain agar hath bachaun apne

aaKHiri baat mujhe yaad hai us ki 'anwar'

jaane wale ko gale se na lagaun apne