kyun teri qand-labi KHush-suKHani yaad aai

kyuuñ tirī qand-labī ḳhush-suḳhanī yaad aa.ī

zahar-afshānī-e-dunyā-e-danī yaad aa.ī

pa.e-gul-gasht-e-chaman phir dil-e-dīvāna chalā

phir tirī sarv-qadī gul-badanī yaad aa.ī

jab kisī jism pe sajte hue dekhā hai libās

terī ḳhush-qāmatī ḳhush-pairahnī yaad aa.ī

yuuñ nibāhā tirā vaada tire ġham ne barsoñ

ġham-e-ayyām kī paimāñ-shikanī yaad aa.ī

jaam uThāte hī dil umDā to bhar aa.iiñ āñkheñ

chashm-e-sāqī tirī sāġhar-shiknī yaad aa.ī

yaad aa.ī na kabhī be-sar-o-sāmānī meñ

dekh kar ghar ko ġharīb-ul-vatanī yaad aa.ī

aaj dikhlāte gul-afshānī-e-guftār 'vahīd'

lag ga.ī chup jo vo ġhuncha-dahnī yaad aa.ī

kyun teri qand-labi KHush-suKHani yaad aai

zahar-afshani-e-dunya-e-dani yaad aai

pae-gul-gasht-e-chaman phir dil-e-diwana chala

phir teri sarw-qadi gul-badani yaad aai

jab kisi jism pe sajte hue dekha hai libas

teri KHush-qamati KHush-pairahni yaad aai

yun nibaha tera wada tere gham ne barson

gham-e-ayyam ki paiman-shikani yaad aai

jam uThate hi dil umDa to bhar aain aankhen

chashm-e-saqi teri saghar-shikni yaad aai

yaad aai na kabhi be-sar-o-samani mein

dekh kar ghar ko gharib-ul-watani yaad aai

aaj dikhlate gul-afshani-e-guftar 'wahid'

lag gai chup jo wo ghuncha-dahni yaad aai