apni ruswai tere nam ka charcha dekhun

apnī rusvā.ī tire naam kā charchā dekhūñ

ik zarā sher kahūñ aur maiñ kyā kyā dekhūñ

niiñd aa jaa.e to kyā mahfileñ barpā dekhūñ

aañkh khul jaa.e to tanhā.ī kā sahrā dekhūñ

shaam bhī ho ga.ī dhuñdlā ga.iiñ āñkheñ bhī mirī

bhūlne vaale maiñ kab tak tirā rastā dekhūñ

ek ik kar ke mujhe chhoḌ ga.iiñ sab sakhiyāñ

aaj maiñ ḳhud ko tirī yaad meñ tanhā dekhūñ

kaash sandal se mirī maañg ujāle aa kar

itne ġhairoñ meñ vahī haath jo apnā dekhūñ

tū mirā kuchh nahīñ lagtā hai magar jān-e-hayāt

jaane kyuuñ tere liye dil ko dhḌaknā dekhūñ

band kar ke mirī āñkheñ vo sharārat se hañse

būjhe jaane kā maiñ har roz tamāshā dekhūñ

sab zideñ us kī maiñ puurī karūñ har baat sunūñ

ek bachche kī tarah se use hañstā dekhūñ

mujh pe chhā jaa.e vo barsāt kī ḳhushbū kī tarah

añg añg apnā isī rut meñ mahaktā dekhūñ

phuul kī tarah mire jism kā har lab khul jaa.e

pankhuḌī pankhuḌī un hoñToñ kā saayā dekhūñ

maiñ ne jis lamhe ko puujā hai use bas ik baar

ḳhvāb ban kar tirī āñkhoñ meñ utartā dekhūñ

tū mirī tarah se yaktā hai magar mere habīb

jī meñ aatā hai koī aur bhī tujh sā dekhūñ

TuuT jaa.eñ ki pighal jaa.eñ mire kachche ghaḌe

tujh ko maiñ dekhūñ ki ye aag kā dariyā dekhūñ

apni ruswai tere nam ka charcha dekhun

ek zara sher kahun aur main kya kya dekhun

nind aa jae to kya mahfilen barpa dekhun

aankh khul jae to tanhai ka sahra dekhun

sham bhi ho gai dhundla gain aankhen bhi meri

bhulne wale main kab tak tera rasta dekhun

ek ek kar ke mujhe chhoD gain sab sakhiyan

aaj main KHud ko teri yaad mein tanha dekhun

kash sandal se meri mang ujale aa kar

itne ghairon mein wahi hath jo apna dekhun

tu mera kuchh nahin lagta hai magar jaan-e-hayat

jaane kyun tere liye dil ko dhDakna dekhun

band kar ke meri aankhen wo shararat se hanse

bujhe jaane ka main har roz tamasha dekhun

sab ziden us ki main puri karun har baat sunun

ek bachche ki tarah se use hansta dekhun

mujh pe chha jae wo barsat ki KHushbu ki tarah

ang ang apna isi rut mein mahakta dekhun

phul ki tarah mere jism ka har lab khul jae

pankhuDi pankhuDi un honTon ka saya dekhun

main ne jis lamhe ko puja hai use bas ek bar

KHwab ban kar teri aankhon mein utarta dekhun

tu meri tarah se yakta hai magar mere habib

ji mein aata hai koi aur bhi tujh sa dekhun

TuT jaen ki pighal jaen mere kachche ghaDe

tujh ko main dekhun ki ye aag ka dariya dekhun