itni muddat baad mile ho

itnī muddat ba.ad mile ho

kin sochoñ meñ gum phirte ho

itne ḳhā.if kyuuñ rahte ho

har aahaT se Dar jaate ho

tez havā ne mujh se pūchhā

ret pe kyā likhte rahte ho

kaash koī ham se bhī pūchhe

raat ga.e tak kyuuñ jaage ho

meñ dariyā se bhī Dartā huuñ

tum dariyā se bhī gahre ho

kaun sī baat hai tum meñ aisī

itne achchhe kyuuñ lagte ho

pīchhe muḌ kar kyuuñ dekhā thā

patthar ban kar kyā takte ho

jaao jiit kā jashn manāo

meñ jhūTā huuñ tum sachche ho

apne shahar ke sab logoñ se

merī ḳhātir kyuuñ uljhe ho

kahne ko rahte ho dil meñ

phir bhī kitne duur khaḌe ho

raat hameñ kuchh yaad nahīñ thā

raat bahut hī yaad aa.e ho

ham se na pūchho hijr ke qisse

apnī kaho ab tum kaise ho

'mohsin' tum badnām bahut ho

jaise ho phir bhī achchhe ho

itni muddat baad mile ho

kin sochon mein gum phirte ho

itne KHaif kyun rahte ho

har aahaT se Dar jate ho

tez hawa ne mujh se puchha

ret pe kya likhte rahte ho

kash koi hum se bhi puchhe

raat gae tak kyun jage ho

mein dariya se bhi Darta hun

tum dariya se bhi gahre ho

kaun si baat hai tum mein aisi

itne achchhe kyun lagte ho

pichhe muD kar kyun dekha tha

patthar ban kar kya takte ho

jao jit ka jashn manao

mein jhuTa hun tum sachche ho

apne shahar ke sab logon se

meri KHatir kyun uljhe ho

kahne ko rahte ho dil mein

phir bhi kitne dur khaDe ho

raat hamein kuchh yaad nahin tha

raat bahut hi yaad aae ho

hum se na puchho hijr ke qisse

apni kaho ab tum kaise ho

'mohsin' tum badnam bahut ho

jaise ho phir bhi achchhe ho