lutf o karam ke putle ho ab qahr o sitam ka nam nahin

lutf o karam ke putle ho ab qahr o sitam kā naam nahīñ

dil pe ḳhudā kī maar ki phir bhī chain nahīñ ārām nahīñ

jitne muñh haiñ utnī bāteñ dil kā pata kyā ḳhaak chale

jis ne dil kī chorī kī hai ek usī kā naam nahīñ

jalva o dil meñ farq nahīñ jalve ko hī ab dil kahte haiñ

yaanī ishq kī hastī kā āġhāz to hai anjām nahīñ

ruk ke jo sāñseñ aa.iiñ ga.iiñ maanā ki vo aaheñ thiiñ lekin

aap ne tevar kyuuñ badle aahoñ meñ kisī kā naam nahīñ

ishq ke āzārī bhī kahīñ mar jaane se jī jaate haiñ

le ye tasallī rahne de ai maut ye terā kaam nahīñ

kab se paḌī haiñ dil meñ tere zikr kī saarī rāheñ band

barsoñ guzre is bastī meñ rasm-e-salām-o-payām nahīñ

had thī ye betābi-e-dil kī jāniye ab kyā honā hai

sabr kī had bhī hone aa.ī sub.h nahīñ yā shaam nahīñ

dil pe apnā bas nahīñ chaltā un kī shikāyat kyā kiije

aap ham apne dushman Thahre dost pe kuchh ilzām nahīñ

dil se kisī kī āñkhoñ tak kuchh raaz kī bāteñ pahuñchī haiñ

aañkh se dil tak aayā ho aisā to koī paiġhām nahīñ

naza.a meñ 'fānī' tū ne ye kis kā chupke chupke naam liyā

kyuuñ o kāfir terī zabāñ par ab bhī ḳhudā kā naam nahīñ

lutf o karam ke putle ho ab qahr o sitam ka nam nahin

dil pe KHuda ki mar ki phir bhi chain nahin aaram nahin

jitne munh hain utni baaten dil ka pata kya KHak chale

jis ne dil ki chori ki hai ek usi ka nam nahin

jalwa o dil mein farq nahin jalwe ko hi ab dil kahte hain

yani ishq ki hasti ka aaghaz to hai anjam nahin

ruk ke jo sansen aain gain mana ki wo aahen thin lekin

aap ne tewar kyun badle aahon mein kisi ka nam nahin

ishq ke aazari bhi kahin mar jaane se ji jate hain

le ye tasalli rahne de ai maut ye tera kaam nahin

kab se paDi hain dil mein tere zikr ki sari rahen band

barson guzre is basti mein rasm-e-salam-o-payam nahin

had thi ye betabi-e-dil ki jaaniye ab kya hona hai

sabr ki had bhi hone aai subh nahin ya sham nahin

dil pe apna bas nahin chalta un ki shikayat kya kije

aap hum apne dushman Thahre dost pe kuchh ilzam nahin

dil se kisi ki aankhon tak kuchh raaz ki baaten pahunchi hain

aankh se dil tak aaya ho aisa to koi paigham nahin

naza mein 'fani' tu ne ye kis ka chupke chupke nam liya

kyun o kafir teri zaban par ab bhi KHuda ka nam nahin