main aarzu-e-jaan likhun ya jaan-e-arzu!

maiñ ārzū-e-jāñ likhūñ yā jān-e-ārzū!

tū hī batā de naaz se īmān-e-ārzū!

aañsū nikal rahe haiñ tasavvur meñ ban ke phuul

shādāb ho rahā hai gulistān-e-ārzū!

īmān o jaañ nisār tirī ik nigāh par

tū jān-e-ārzū hai tū īmān-e-ārzū!

hone ko hai tulū sabāh-e-shab-e-visāl

bujhne ko hai charāġh-e-shabistān-e-ārzū!

ik vo ki ārzuoñ pe jiite haiñ umr bhar

ik ham ki haiñ abhī se pashīmān-e-ārzū!

āñkhoñ se jū-e-ḳhūñ hai ravāñ dil hai daaġh daaġh

dekhe koī bahār-e-gulistān-e-ārzū!

dil meñ nashāt-e-rafta kī dhundlī sī yaad hai

yā sham-e-vasl hai tah-e-dāmān-e-ārzū!

'aḳhtar' ko zindagī kā bharosa nahīñ rahā

jab se luTā chuke sar-o-sāmān-e-ārzū!

main aarzu-e-jaan likhun ya jaan-e-arzu!

tu hi bata de naz se iman-e-arzu!

aansu nikal rahe hain tasawwur mein ban ke phul

shadab ho raha hai gulistan-e-arzu!

iman o jaan nisar teri ek nigah par

tu jaan-e-arzu hai tu iman-e-arzu!

hone ko hai tulu sabah-e-shab-e-visal

bujhne ko hai charagh-e-shabistan-e-arzu!

ek wo ki aarzuon pe jite hain umr bhar

ek hum ki hain abhi se pashiman-e-arzu!

aankhon se ju-e-KHun hai rawan dil hai dagh dagh

dekhe koi bahaar-e-gulistan-e-arzu!

dil mein nashat-e-rafta ki dhundli si yaad hai

ya sham-e-wasl hai tah-e-daman-e-arzu!

'aKHtar' ko zindagi ka bharosa nahin raha

jab se luTa chuke sar-o-saman-e-arzu!