main dhund-fazaon mein uDa bhi hun gira bhi

maiñ dhund-fazāoñ meñ uḌā bhī huuñ girā bhī

thī quvvat-e-parvāz bhī aur ḳhauf-e-qazā bhī

maiñ apne hī zindān-e-tilismī kā zubūñ thā

har-chand tirī sho.abada-kārī se bachā bhī

laa.ī hai kahāñ mujh ko tabī.at kī do-rañgī

duniyā kā talabgār bhī duniyā se ḳhafā bhī

pā-basta-e-zanjīr-e-havā chhūT ga.e haiñ

mauqūf huā silsila-e-qatl-e-navā bhī

ḳhvābīda lahū bāzū-e-parvāz meñ jaagā

raushan huī dhundlā.ī huī zard fazā bhī

āñkheñ haiñ magar ḳhvāb se mahrūm haiñ 'mid.hat'

tasvīr kā rishta nahīñ rañgoñ se zarā bhī

main dhund-fazaon mein uDa bhi hun gira bhi

thi quwwat-e-parwaz bhi aur KHauf-e-qaza bhi

main apne hi zindan-e-tilismi ka zubun tha

har-chand teri shoabada-kari se bacha bhi

lai hai kahan mujh ko tabiat ki do-rangi

duniya ka talabgar bhi duniya se KHafa bhi

pa-basta-e-zanjir-e-hawa chhuT gae hain

mauquf hua silsila-e-qatl-e-nawa bhi

KHwabida lahu bazu-e-parwaz mein jaga

raushan hui dhundlai hui zard faza bhi

aankhen hain magar KHwab se mahrum hain 'midhat'

taswir ka rishta nahin rangon se zara bhi