main dil mein unki yaad ke tufan ko pal kar

maiñ dil meñ un kī yaad ke tūfāñ ko paal kar

laayā huuñ ek mauj-e-taġhazzul nikāl kar

paimāna-e-tarab meñ kahīñ baal aa gayā

maiñ garche pī rahā thā bahut hī sambhāl kar

mahfil jamī huī hai tirī raah meñ koī

ai gardish-e-zamāna bas itnā ḳhayāl kar

āzād jins-e-dil ko faqat ik nazar pe bech

saudā girāñ nahīñ na bahut qīl-o-qāl kar

ḳhat ke javāb meñ na lagā itnī der tū

merā agar nahīñ hai to apnā ḳhayāl kar

kyuuñ maiñ ne dil diyā hai kise maiñ ne dil diyā

ai aql aaj mujh se na itne savāl kar

ai dil ye rāh-e-ishq hai rāh-e-ḳhirad nahīñ

is par qadam baḌhā tū zarā dekh bhaal kar

phir ishq bazm-e-husn kī jānib ravāñ hai aaj

dīvāngī ko aql ke sāñche meñ Dhaal kar

'āzād' phir dakan kā samundar hai aur tū

le jā dil o nazar kā safīna sambhāl kar

main dil mein un ki yaad ke tufan ko pal kar

laya hun ek mauj-e-taghazzul nikal kar

paimana-e-tarab mein kahin baal aa gaya

main garche pi raha tha bahut hi sambhaal kar

mahfil jami hui hai teri rah mein koi

ai gardish-e-zamana bas itna KHayal kar

aazad jins-e-dil ko faqat ek nazar pe bech

sauda giran nahin na bahut qil-o-qal kar

KHat ke jawab mein na laga itni der tu

mera agar nahin hai to apna KHayal kar

kyun main ne dil diya hai kise main ne dil diya

ai aql aaj mujh se na itne sawal kar

ai dil ye rah-e-ishq hai rah-e-KHirad nahin

is par qadam baDha tu zara dekh bhaal kar

phir ishq bazm-e-husn ki jaanib rawan hai aaj

diwangi ko aql ke sanche mein Dhaal kar

'azad' phir dakan ka samundar hai aur tu

le ja dil o nazar ka safina sambhaal kar